股海實戰：華潤創業可安度寒冬

尋日股海交投淡靜，大市成交603億元，扣除美銀減持建行（00939）股份再有10.24億股上板，實際成交僅得552億元左右。總而言之，短線恒指上唔番萬九點樓上，走勢轉弱，向下回補上升裂口位（18,082至18,435點）機會增加。執筆時傳來西班牙剛拍賣嘅十年期國債平均孳息率達6.975厘，「歐豬」CDS又告飆升，看來好友難有發圍機會。

中資股普遍受壓，見到過去冇人問津嘅電訊設備股同電力股，最近都先後炒起，就知呢期炒家幾咁缺乏炒作對象。MSCI指數系列新貴仍有捧場客，貨乾嘅高鑫（06808）繼續挾倉。阿莊睇咗兩日嘅藍籌新貴旺旺（00151），股價唔多肯回，遂以平均價7.3元買番8萬股，喺下月五日變動生效前會伺機沽出。

啤酒業務相對穩定

講開藍籌股，華創（00291）公布第三季度業績，營業額同比增長25.9%至307.95億元，若扣除資產重估及重大出售事項嘅稅後收益，第三季及首九個月純利同比分別減少15.5%及增長3.3%。由於季度純利倒退，尋日股價曾低見25.2元，但尾市又再抽上，並以全日高位26.05元收市，跌0.38%，成交1.97億元。

以營業額計，季內飲品及食品收入同比增幅分別達到45.4%及35.9%，零售業務佔收入比重最大，金額達176億元，同比增27%。不過，若以純利計，零售業務貢獻同比倒退39.7%、飲品及食品貢獻亦分別下跌26%及32%，獨啤酒業務相對穩定，純利貢獻同比微增1.5%。

公司解釋，季績倒退，主要係稅務開支增加、加上員工成本上漲，以及公司加快建立零售網點，令成本壓力大增。在近期外圍市況未明，影響內地消費意欲下，料短期內消費品業務仍然受壓。

之不過，華創零售業務所面對嘅經營壓力，相信亦係同業普遍都要面對嘅問題，而透過嚴控成本以及彰顯規模效益，相信公司有能力安度經濟寒流。加上集團維持淨現金狀態，手持現金及等值逾160億元（截至六月底止），料可把握市況低迷加快購併步伐，最近便有消息指，旗下雪花啤酒擬收購三得利啤酒喺江蘇嘅三家工廠，以鞏固其於江蘇市場嘅領導地位。

阿莊對上一次品評華創係八月中業績公布前，當月曾短炒一轉。上月初其股價低見24.1元後回升，基本上，24至25元乃自○九年末季以來嘅主要支持區，每逢跌至該水平回穩嘅話，可留意低吸機會，主要阻力喺30元。