樓市出更：港房產專才年薪逆漲19%

尋日英國皇家特許測量師學會（下稱RICS）公布亞洲房地產專才年度薪酬統計，其中香港房地產專才平均年薪已連升兩年，今年比舊年升咗19.6%至近11.8萬美元，升幅較去年高咗17.9個百分點；不過，亞洲區人均年薪就跌咗約5.9%，相信係受中國內地人均年薪大跌所拖累。

上述RICS嘅年度薪酬調查喺今年八至九月期間進行，於網上訪問1,291位亞洲專業人士，結果顯示，佢哋今年嘅平均年薪對比舊年少咗約5.9%至89,851美元，其中受中央嚴控樓市影響嘅內地專才薪酬「跌得最甘」，人均年薪按年銳減約29.8%至68,344美元。

星人工升幅冠亞洲

亞洲有不少地區房地產發展蓬勃，業界專才年薪有顯著增長，包括劉Sir最關心嘅香港區，人均年薪較去年98,652美元，增長約19.6%至今年嘅近117,969美元，升幅比去年只係1.7%，大增17.9個百分點，係少數連續兩年增長地區。至於今年人工升幅最大地區係新加坡房地產專才，今年平均年薪達至約123,778美元，按年升約兩成。

基建啟動 測量業勢旺

港府不斷透過增加供應及推出額外印花稅等意圖令樓市降溫，不過據上述統計，今年業界專才薪金仍有增長。

RICS香港委員事務委員會主席蘇振顯話，其實香港建築行業的就業情況十分平穩，特別是估價、規劃及工管等範疇，政府力推基建工程，而部分大型項目啟動在即，估計未來數年對專業測量師需求將會增加，與建築有關嘅測量行業料會興旺。