股海實戰：海爾逢低唔怕買

歐債危機鑊鑊新鮮鑊鑊甘，意債孳息率一度再衝7厘警戒線，西班牙及比利時拍賣國債孳息率飆升，又要擔心法國主權評級，搞到魚缸中人信心盡失，港股插穿萬九點收場。

尋日港股牛熊證及窩輪佔大市成交比例回升至接近37%，其中窩輪成交乃自十一月三日以來首次再重上100億元大關，皆因股票冇得炒，惟有轉炒窩輪同牛熊證，博一博冇頻撲！另外，尋日沽空額55.9億元，沽空比例回升至9.15%，須留意空軍會否捲土重來。

國壽（02628）首十月營運數字欠驚喜，加上尋日滬綜指跌逾2%，內險股可謂首當其衝，國壽及平保（02318）均跌逾5%，太保（02601）跌逾6%，而內銀股亦全線低收。

十大新貴受追捧

尋日提到嘅上海醫藥（02607），咁啱被納入MSCI中國指數，股價逆市升3.42%。值得一提，今次MSCI中國指數有十隻新貴，除上藥外，三隻係汽車服務股，包括大昌行（01828）、中升（00881）及正通（01728）；兩隻燃氣股盈德（02168）及潤燃（01193）；三隻零售股高鑫（06808）、海爾（01169）及達芙妮（00210），還有一隻係食正水緊潮嘅遠東宏信（03360）。至於被剔除嘅股份，主要係鋼鐵、煤礦、建材、內房、風電、體育用品股以及仍在停牌嘅超大（00682）。

基本上，MSCI中國指數成分股變化可反映基金大戶取捨，未來六個月要候低吸納，亦不妨從新貴股類入手。阿莊早前亦品評過海爾與凱雷投資旗下Hawaii Asia合作，又與英國大型零售商Home Retail Group成立合營，拓展內地零售市場，發展策略正確。

內地十月份全國家電下鄉銷售品及銷售額分別同比增長53.6%及71.1%，雖然十一月開始首批省市家電下鄉政策退出，明年底前尚有一批省份到期，但相信家電商已相應調整銷售策略，未來六個月嘅銷售表現，足以說明誰能站穩住腳，成為真正贏家。呢一刻，阿莊仍對海爾有信心，每逢14日RSI現超賣，又可放膽入場執平貨。