炒家愛磚頭舖市跌唔落

受額外印花稅（SSD）措施影響，過去一年住宅短炒個案近乎絕迹，資金喺缺乏出路下，轉而流入工商舖市場，令到該類物業交投激增，劉Sir睇到地產代理嘅數據，原來過去一年，工商舖買賣有超過1.6萬宗，金額亦逾1,328億元，比措施推出前一年多出8%及22%。

美聯工商舖（00459）資料顯示，舊年SSD生效當月，工商舖買賣就錄到1,805宗，金額有近145億元，按月急增逾32%及40%，跟住嘅十二月去到今年八月，工商舖每月成交逾千宗，每月介乎1,000至1,700多宗。

商舖交投回氣料再旺

近排本港整體物業成交縮減，連累工商舖成交喺九月都大跌，九月及十月分別只得約825與561宗，而今年十一月上半月暫時得206宗，但業內人士估計，始終有唔少人寧願買磚頭抗通脹，所以估計短期內該類物業成交將止跌回升。

由於喺SSD措施後，多咗人炒工商舖，令到摸貨比率顯升，舊年十一月工商舖摸貨比率就升到9.09%，按月多咗近2.5個百分點，之後每個月相關比率都保持超過8%水平，其中今年五月更錄到11.2%，更加係○五年四月後嘅新高。

美聯工商舖行政總裁黃子華話，SSD推出約一年間，部分原投資住宅市場的買家，都分散資金於工商舖物業市場，估計佔期內工商舖買賣成交約15%至20%，比例料較措施推出前多約10個百分點。

銅鑼灣舖三天賺380萬

另一方面，資深投資者黃海明早排亦趁機摸出銅鑼灣景隆街15至27號地下部分，涉資約3,000萬元，短短三天帳面速賺約380萬元。他認為，低息環境持續，工商舖物業市場前景仍然樂觀，惟歐債問題現時困擾環球經濟，故入市時要較為審慎。