股海實戰：行業重組購併成趨勢 上藥可搭順風車

意大利同西班牙嘅國債孳息率同創新高，令前日股市嘅利好氣氛無以為繼，恒指回試19,200至19,300點水平承接，扣除美銀減持建行（00939）股份部分上板，大市成交５00億唔到。

聽講美銀手貨大部分回流祖國，難怪建行股價不跌反升，咁亦顯示上大人「維穩」股市嘅決心，再睇人行最新拍賣嘅一年期央票，息率連續第二個星期回落，顯示確有放鬆銀根嘅迹象，只要中央繼續亮出「微調」王牌，即使歐債危機繼續傳來火燒連環船嘅利淡消息，空軍做嘢始終會有所顧忌。之不過，恒指遲遲未能突破兩萬點關，技術走勢亦開始轉弱，究竟年底前係好淡雙方繼續搓波，抑或係再行大單邊，阿莊無意用銀彈找答案，故短期唔會有大動作，小注怡情打吓游擊則尚可！

念念不忘上實城開

今年民企股多災多難，皆因空軍頻頻發動攻勢，受影響較大嘅有雨潤（01068），另綠森（00094）股價亦由高位急挫逾八成多，尋日傳來其母公司嘉漢林業董事會獨立委員會調查結果顯示並無欺詐行為，綠森股價自然乘機大平反，尋日急升逾九成，收報1.16元。

上實城開（00563）自收歸上實（00363）旗下，身份已由民企股變成紅籌股。雖然阿莊早前已沽出該股，但對之仍念念不忘。上實城開收購上海城開59%嘅交易，會喺本周四嘅股東會上審議，見本月以來隻股交投有所增加，心思思又想買番啲貨，呢兩日會睇情況作決定。

講開上海市旗下公司，唔爭在睇埋上實集團旗下嘅上海醫藥（02607），已公布今年首三季純利同比增長45%，至17.3億元人仔。相信宏調對醫改進度影響不大，企業兼併整合係大勢所趨，廣藥（00874）母公司最近便提出重大資產重組計劃，類似上藥這類紅籌大藥企，亦有能力充當行業整合嘅領軍者，而除本土市場，早前管理層亦提及海外收購部署，估計明年中前或有眉目。

尋日上藥股價逆市上升2.6%，收報14.62元，剛重上20日線，向上較大阻力在50日線15.7元，主要支持喺13.6至13.8元區域，趁行業有大型重組活動，不妨留意有冇順風車坐。