樓市出更：投資移民尾班車買樓130億

政府舊年為令樓市降溫，將房地產投資喺投資移民計劃中剔除，美聯移民顧問行政總裁吉安同劉Sir講，今年頭三季投資移民申請數字，由舊年同期嘅5,128宗，大減至2,535宗，預期今年全年數字可能唔夠3,500宗，按年急挫近五成，由於政府早前推出嘅樓市調控措施漸見成效，所以建議可以將房地產投資再次納入投資移民嘅資產類別。

吉安又話，今年首三季有3,320宗投資移民正式獲批數字，比舊年同期嘅2,201宗明顯上升，涉及房地產投資嘅金額亦升咗約42.3%至130.2億元，佔整體成交額3.6%。但由於數字屬滯後，當舊年累積嘅申請個案陸續審批之後，估計今季仍有30至40億進帳，明年起投資移民獲批買樓個案就將拾級而下。

千萬元樓下物業搶手

喺今年暫錄嘅2,535宗申請中，有多達2,362宗係內地投資移民（即係中國籍而已取得外國永久性居民身份嘅人），佔整體申請比例嘅93.2%，比去年嘅89.8%進一步攀升，根據美聯移民顧問客戶嘅資料睇到，首三季申請來港人士主要嚟自福建省，佔19%，而浙江省同廣東省分別佔13%與12%。而最受投資移民買家歡迎嘅物業類別，首推係650萬至1,000萬元嘅物業，佔比例五成，而買1,000萬元以上物業都佔超過三成。

業界倡重納房產類別

該行喺十一月七日到十一日，就有關《投資移民來港置業》議題，用電話訪問咗60名投資移民客戶，有80%人話剔除房地產項目對佢哋嚟香港投資移民取態有影響，只有18%受訪者認為冇影響。

被問到喺股市波動下，有73%受訪者認為在港買磚頭比買股票更為穩陣，認為唔係或無意見就佔23%及4%。吉安話，佢哋有個投資移民客近排投資股票蝕咗四成，所以如果將房地產重新納入投資移民資產類別，咁大家可以多一個選擇，亦可以平衡投資移民人士嘅風險。