樓市出更：旺角奀舖呎價12萬

旺角波鞋街大搞重建，唔少投資老手睇好呢區後市，已密密手喺附近入貨博升值；好似早前政府招標嘅旺角亞皆老街同黑布街交界地下400方呎都唔夠嘅舖仔，早前截標勁收29份標書，啱啱知道中標價高達4,688萬，呎價差唔多12萬，有搶唔到嘅投資者話個價好貴。

有代理話，呢個舖市值月租可去到18萬，較原先高2.6倍，屆時收租回報逾四厘六，舖王都望塵莫及。

睇番地政總署資料，上述地舖面積396方呎，以成交價4,688萬計，呎價11.8萬，個舖所在地現時唔算旺，比起區內西洋菜南街核心地段仍有一定距離，但已屬該地段指標成交。

睇番土地註冊嘅資料，是次亞皆老街舖買家為李煥廉。據悉上址上月截標，接29份標書，當中包括英皇國際（00163）及一眾資深舖位投資者。

「摸王」出貨罕有微賺

聽區內代理講，上述舖位屬亞皆老街88至96號、染布房街19號及黑布街104號地下E舖，租客包括經營眼鏡等民生行業，租金估計大約5萬元左右，最重要係個舖轉個彎行出去，已經係波鞋街及麥花臣重建項目，未來租金自然有保證；粗略估計，個舖目前市值月租可以升至18萬元，比起依家升咗成倍。

近排個市忽冷忽熱，唔少投資者寧願少賺離場，有老友報料，有「摸王」之稱嘅資深投資者黎汝遠（黎Sir）或有關人士啱啱「摸」出咗上環俊和商業中心一個中層單位，涉資近1,360萬，呎價約6,800元，件貨揸咗唔夠半年，帳面微賺不足廿萬，估計扣埋使費之後，真正落袋只係得幾萬，黎Sir好少賺咁少出貨，大家都要好好諗吓係咪要跟風。