Fundman睇市：華晨貨源歸邊跌唔落

周四意大利拍賣兩年期債券，市場反應唔錯，拖低十年債息，周五回到7厘樓下，港股上周五回升173點，收報19,137點，成交只及周四大跌市的七成，得528億。值得注意的是，周四恒指由兩萬跌落萬九點，當日沽空佔大市成交比例已經回升至9%樓上，去到9.15%（撇除工行（01398）配股後大孖沙套戥活動令工行成交上升，實際應在10%樓上），周五反彈只係追番前一日跌幅16.5%，沽空佔成交比例升到三星期高位見9.77%，睇嚟淡友估再穿萬九，機會遠遠大過上返兩萬樓上。

收市後，恒指服務公司將康師傅（00322）及旺旺（00151）兩隻內地食品股加入恒指行列，話就話兩隻都係冷門入選，但康師傅同旺旺市值分別有1,168億及926億，論晒士絕對唔細，市值比最奀嘅思捷（00330）（128億），分別大8.1及7.1倍，有趣是兩隻食品股今年無跟大市向下，年初至今恒指跌17%，佢哋升5%及2.9%，一一年市盈率30.8倍及31倍，比恒指預期市盈率十二倍左右高一大截，也因此，過去幾個月一直係淡友目標，累積沽空唔細，康師傅今年每日平均沽空佔成交比重大約27%，每四股交易就有一股沽空，染藍之後，預期淡友要同指數基金一齊搶貨。

內地進口增長超預期

意大利國債息大幅回落，刺激歐美股市做好，大部分都已經逼近上周初的高位，到底意債危機係咪虛驚一場？惟有等時間證明，滙控（00005）季度業績之後，分析員對短期復甦及提高派息，已不存寄望，高盛及美銀又隨時會再沽工行及建行（00939），成為大市反彈的一大絆腳石。

內地十月份出口增長回落到15.9%，見八個月低位，數據差過市場預期，但係進口增長28.7%，卻遠高過估計的23至24%。睇內裏成分，單是原油增長達27%，已佔28.7%增長的六點六個百分點，鋼鐵升40%、汽車及飛機增長65%及175%，歐美經濟進入寒冬，看來全世界只得祖國還有條件四圍搜購天然資源，大款四圍買超級名車。

金融海嘯以來，內地高級房車年銷售增長達54%，較整體乘用車年增長35%高一截，本地幾隻車股中，最受惠的非要數與寶馬組成合營的華晨（01114）莫屬，估計到一二年初，當新產能投入後，總產能將達到15萬架，實質產量會去到14萬架，較一○年全年的7萬架，足足多出一倍。

高級車在內地需求不缺，亦都令華晨較其他汽車股有更高的估值，一二年預期市盈率14.7倍，相比東風的7.6倍高出一截，到底溢價可以維持幾耐，無人知，尤其一睇華晨主要街外股東名單，華晨集團本身揸45.35%、鄧普頓16.07%、惠理10.9%，摩通5.6%，未計唔夠5%的富達、麥格理、景順、貝萊德等，四大股東揸貨近七成八，除非業績嚴重偏離預測，否則這批基金股東未必沽貨，貨源相當歸邊，近一個月股價由5元邊，反彈到接近9.5元，短期估值已差不多回到合適水平，未必有太大升幅，但貨乾加上預期業績增長會大於其他車股，要大幅回吐同樣不易，如果能夠回到8.2元附近，即十月中反彈第一個阻力位，已經值得吸納。