股海實戰：港交所捱過艱難時刻

上周五美股在企業業績以及經濟數據消息帶動下高收，港股ADR亦見回升，加上周末期間歐債危機變化趨向正面，相信今日港股可持續靠穩，但從交投睇嚟，呢兩個星期投資者已被「歐豬」嚇怕，入市態度已轉趨審慎，料市況會呈窄幅上落，周初波幅料介乎19,000至19,500點。

內地上周五公布十月份新增人仔貸款5,868億元，乃四個月來新高，證明十月底溫總拋出「微調」論前經已開始「做嘢」，相信放水對象主要集中鐵道業及中小企業。喺預期十一及十二月新增人仔貸款合共約1.3萬億元嘅情況下，料有助企業安度年關，A股亦有條件持續靠穩。

旺旺爆冷成新貴

恒指成分股季度檢討爆冷，思捷（00330）幸保藍籌地位，而兩隻新貴為旺旺（00151）同康師傅（00322）。其實事前亦有人貼康師傅染藍，但旺旺則可以話係「超冷」，如今多咗兩隻內地食品股做成分股，恒指嘅內需比重又再增加。只可惜阿莊上周見CPI數據公布後旺旺炒唔起，故先行沽出，睇睇今日高開幾多再作打算。

同時，國企指數亦有一出一入，被剔出嘅係中海發展（01138），而新貴就係山東威高（01066）。上周五威高股價升6.3%，係上周四見五十二周低位後觸發反彈，抑或有春江鴨，不得而知。另外，恒生中國內地100指數亦一加一減，高鑫（06808）成新貴，剔除忠旺（01333），上周先後有大行唱好高鑫，上周五股價隨即創掛牌以來新高，睇怕仲未挾完！

港交所（00388）上周五宣布季度業績，純利12.37億元，同比增1%，每股盈利1.15元；而首三季度純利則為38.21億元，同比增長9.8%，每股盈利3.55元。

照計第三季係港交所年內經營表現最差嘅一季，隨着十月以來內地銀根略為放鬆，加上年底前有多隻大型IPO（如周大福、海通證券、新華人壽等）趕住搭尾班車，相信十月初其股價「紅底」告急，已經係年內最壞時刻，料第四季至明年首季，股價會維持喺110至140元水平上落，待內地定調針對內房嘅調控措施收效，又或下調RRR，始有望打破悶局。