酒店地皮肥田人人搶

環球經濟蒙憂，搞到本港樓價亦受累，不過租金就似乎無咩影響，尤其係酒店同服務式住宅嘅租金更加年年穩步上揚，所以唔少財團睇中呢點，近幾年已密密吸納酒店等住宿用地及物業。劉Sir睇番測量師行嘅數據，今年首十一個月，過億元嘅酒店、服務式住宅物業或者地皮成交加埋有12項，總額更加突破40億元，比舊年多咗七成。

舊年政府推出額外印花稅，唔少地產商買地出手都審慎好多，不過對於投資性、兼收租回報穩定嘅物業，出手就絕不手軟。根據韋堅信測量師行嘅資料，今年首十一個月，過億元嘅酒店、服務式住宅相關物業及地盤成交達12項，按年多咗三成三外，亦都多過舊年全年，而期內成交金額更接近40.4億元，比起舊年同期多咗逾16億元，增幅更達七成。

百利保奪兩項目最勇

睇番今年，百利保（00617）系公司極之進取，繼年初以逾1.3億元買入上環文咸西街7號與永樂街171號等一幅酒店地後，到八月時，百利保與富豪酒店（00078）合營公司向金朝陽（00878）再購入北角麥連街14至20號酒店地盤，涉資約4.6億元，講到出手頻密程度，該集團可算係今年眾發展商中最勇。

油麻地全幢億三沽出

值得留意的是，今年政府罕有推出嘅多幅酒店用地，市場反應極佳，好似有八家財團入標爭嘅灣仔皇后大道東373號酒店地，最終由英皇國際（00163）以6.48億元奪得，而西貢市第4區惠民道嘅巨無霸酒店地，就由邵氏兄弟方逸華等僅以7億多元競得。

另邊廂，有財團為咗慳時間，寧願買現樓盡快收租。好似油麻地上海街279至283號一幢CHI Residence全幢服務式住宅，啱啱就以1.3億多元售出。問番韋堅信測量師行商業及投資部董事許偉國點解今年酒店、住宿物業咁旺，佢話依家內地旅客好多都選擇來港消費順道住番幾晚，而本港酒店房間供應未必應付得來，所以唔少財團都睇準機會分一杯羹。