市場徐想：中國電力增長動力強
Prof. J近排忙到不可開交，不過仍要繼續發掘好股票！呢排周圍去睇中國內地嘅情況，發現內地同胞用電情況都幾犀利，燈油火蠟都唔少錢。
中國電力（02380）業務主要都係開發、建設、擁有、經營同埋管理大型發電廠，以及搞吓投資咁。二○一○年中國經濟持續向好，咁當然用多咗電，全社會用電量達4.19萬億千瓦時，比對上一年增長14.56%；不過，集團同時要面對煤炭價格上漲嘅問題。點解？發電要用煤嘛！
集團早前同五凌電力公司搞合併，五凌主要係喺湖南同貴州做水電開發、生產同供應，國家政策當然支持，由於要起間電廠出嚟都唔少嘢，所以五凌電力有今時今日嘅成就唔簡單，同行嚟講佢嘅競爭優勢都幾明顯，盈利能力又夠強。隨住內地人口增加，佢嘅增長前景更為亮麗。
睇番數據，集團市盈率約十一倍，一○年實現盈利增長28%，繼續跟隨內地經濟火車頭增長。繼續追蹤，出發！