銅鑼灣搶貨二線街埋手

銅鑼灣羅素街一帶自從由電車廠重建為大型購物商場後，附近舖位就愈嚟愈旺，近年受惠內地個人遊，連舊樓都搶到幾萬蚊一呎；現時該地段貨源已經歸邊，所以不少買家開始向周邊嘅勿地臣街、霎東街等二線地段埋手，好似過往冇人吼嘅勿地臣街，今年就連錄多宗成交，新近勿地臣街14號以1.88億元賣出，對比七○年時市值只係35萬元，足足高出536倍。

劉Sir數數手指，勿地臣街今年總共錄到約6宗買賣成交，啱啱賣出嘅勿地臣街14號樓齡約四十七年，依家樓高約六層，地舖做緊食肆，至於新買家BARTEX ENTERPRISES LIMITED，由於非香港註冊公司，所以買家背景仍有待分曉。

不過，市場一直傳聞銅鑼灣大業主希慎家族或有關人士，對區內具潛力嘅物業都感興趣。

地舖47年升值926倍

至於勿地臣街18號地舖喺今年中亦賣出，當時作價1.27億元，對比個舖六四年時市值只係13.7萬元，升幅更高達926倍。另外，勿地臣街16、18號嘅樓上舊樓單位，現時成交價亦都去到1,050萬至1,150萬元。

近幾年舊樓有價，事關發展商密密手向小業主收購業權以增土儲。

金朝陽年內收購四項目

好似金朝陽集團今年內已經成功收購咗四個項目，新近喺上個月尾，成功統一收購咗西半山摩羅廟街14至16號整個地盤嘅所有業權，該地盤面積約4,061方呎，現時六層樓高，共有18個單位，若果以地積比率八倍計，可建樓面約3萬多方呎。

而土瓜灣榮光街50號一批小業主亦睇準未來港鐵沙中線效應，最近委託代理標售業權。美聯杜漢祥話，榮光街50號地盤面積約6,175方呎，現時參與標售嘅業主佔81%，截標日期喺十二月六日，如果以地盤百分百業權計算，總估值約2.6億元，每方呎樓面地價約5,300元。