Fundman睇市：聯邦制藥博反彈唔使急

內地食品價格比上半年回落不少，市場估今日公布的中國十月份通脹將大幅回落，有利溫爺爺開始他的微調計劃，一個月上海銀行同業拆息跌到4.91厘，貼近半年低位，中央會否開始放水？大家只能拭目以待。滬綜指已連續四日在2,500點樓上浮沉，好友用橫行去消化超買，假如今日CPI比預期的5.5%低，短期有機會攻上2,580至2,600點關口。

本地投資者向中國CPI行注目禮，加上意大利十年國債孳息朝着7厘進發，不明朗因素影響大孖沙入市興趣，港股成交得番564億元，恒指收市升唔夠1點，報19,678點，令港股日升日跌紀錄延續到第六日，百家樂玩家叫「單跳」的飄忽走勢，仲要玩幾耐？過埋呢兩日，知道意大利總理貝魯斯干尼去留，中國通脹是否大幅回落，到時會知道恒指到底係向19,027點方向，抑或再破20,272點。

電力股可以升多浸

港股由16,170點升上嚟，唔少股票股價由地獄上番天堂，要搵超低殘估值的股票，難度大咗唔少。尋日建議看官們可留意電力股博憧憬加電價，點知一係唔炒，一升誇張到暈，華電（01071）升7.8%、華能（00902）升11.1%、大唐發電（00991）升17.2%，連藍籌華潤電力（00836）都升7.8%。有大行估計，國電局為要解決目前近4萬兆瓦的供電短缺問題，加電價令電企虧損減少，勢難避免。論到對電價的敏感度，華能唔可以睇小，估計每加電價1%，盈利會有7%的增益，今日CPI如果對辦，電力股仲有得炒多浸。

今浪要數落後，藥業股認第二，睇怕無人敢認第一，當中以基金愛股聯邦制藥（03933）最慘烈，尋日復牌兼宣布發行人民幣可換股債券（CB），由於CB條件唔錯，捧場客焗住沽股買CB，股價插到5.22元一年新低，收5.29元，今年累跌66.8%，揸貨者食幾多藥都醫唔番。

聯藥的二○一六年到期CB，涉及7.9億元人民幣，可加碼至9.9億人民幣，行使價7.2港元，CB有7.5厘年息，悉數兌換，相當於1.69億股新股，或者擴大後股本11.49%。停牌前聯藥股價6元，換個角度，如果持聯藥正股，真係沽股買CB好過，簡單計，撇開匯率及資金成本因素，買CB每年收7.5厘年息，五年後收番本金的37.5%，再以7.2元換成正股，意味實際換成正股的成本，只係4.5元，比6元或者昨日收市價5.29元要低25%或者15%，五年後如果股價未返到7.2元樓上，仲可以唔行使收回成本，真的是進可攻，退可守。

國家醫療改革，要求藥品降價，對聯藥的影響唔細，上半年毛利收窄5個百分點，去到35.6%，盈利大跌36.4%至3.077億元人民幣，儘管下半年向來是抗生素銷售旺季，但由業務指引管理層預測，毛利至多和上半年持平，難見反彈，使大行轉軚，紛紛睇淡六至十二個月業績表現。以11.5倍市盈率，基本上這間抗生素原料藥企業，估值經已反映短期增長放緩問題，唯獨CB買家的對沖活動，是否已經完成，是另一個問號，筆者估計今次跌至4.5至5元的可能性頗大，除非成交縮番股價開始穩定，否則唔使咁急諗住博反彈。