股海實戰：王朝酒業醞釀破位

意大利政局待變，市場避險情緒升溫，資金流入金市，反觀金魚缸就繼續交投淡靜，恒指尋日再次受阻於兩萬點關，收市僅升0.58點，報19,678點，期指高水118點收市，話唔定預告今日內地公布CPI，港股走勢會先高後低。

將於今日宣布第三季度成績表的騰訊（00700），為表現最差藍籌，一度低見162元，收報164.9元，跌5.45%，更成為沽空榜榜首。

追電力股要注意風險

十月CPI公布前夕，游資已率先炒上受惠股類，尋日電力股由頭威到落尾，表現最佳嘅係大唐（00991），升幅17%，其次係華能（00902），升幅11%；另華電（01071）、潤電（00836）及中國電力（02380）同升逾7%，整個板塊可謂一洗頹風，咁啱有大行話有五大理由上調電力股估值。但阿莊提醒各位，提防大戶精心部署燒冷灶，喺確認行業走出谷底前，高追相關股份宜注意風險，量力而為。

百勝收購小肥羊（00968）嘅交易順利通過商務部嘅反壟斷審批，股價即勁彈15%。正由於有成功案例，市場乘機翻炒購併概念股，好似曾獲可口可樂提購併但最終未有成事嘅匯源（01886），股價急升9.74%。另外，憧憬通脹回落，兩隻酒股通天（00389）同王朝（00828）亦齊齊開車，通天升10%，王朝升8%。

查實，呢兩隻酒股上半年業績都唔太好，故兩者股價均較去年末季高位累跌逾七成，至今年九月底十月初先至先後觸底回升。集中講王朝，上半年業績倒退，主要係受成本增加、紅葡萄酒產品銷售佔總收入比例下降，以及內地附屬獲新徵稅項，整體毛利率同比降8個百分點，至42%。

最近王朝在港參加紅酒展，管理層指歐美經濟不明朗，反有利以較低成本開拓海外市場，另公司會繼續推出中高檔嘅新產品，以維持毛利率水平。至於新收購，查實中期業績中已提及公司與一家位於新西蘭南島嘅精品葡萄酒公司，進行洽商及審閱，可留意年底前能否開花結果。

過去兩個月王朝股價在低位營造出小圓底，近日突破2元關，約略升穿了過去一年嘅降軌阻力位，若能企穩2元樓上，配合行業步入新年及春節銷售旺季，股價可確認扭轉跌勢，但能否重掀升浪，則要視乎下半年毛利率是否有改善，以及收購新項目嘅進展。暫看向上較大阻力喺2.5元，支持位1.85元。