樓市出更：九龍塘炒盤乍現嗌貴66%

政府舊年推出額外印花稅措施，加上今年樓價升勢放緩，令一班炒家紛紛撤出短炒市場，搞到市場嘅短炒放盤可謂少之又少，不過，市場最近就出現一個罕有嘅豪宅短炒放盤，劉Sir收到風，話有個投資者今年八月買入嘅九龍塘根德道31號，最近已經以摸貨形式放售，叫價約1.25億元，比買入價足足高出約66%，即使扣除額外印花稅15%，賺價都相當和味。

由於扣除額外印花稅同釐印、佣金等使費後，投資者半年內賣樓起碼帳面要賺兩成以上，先至叫有少少肉食，所以近一年市場絕少有短炒放盤出現。

倘摸出除稅亦勁賺

今次放盤嘅根德道31號，地盤面積約3,545方呎，上蓋洋房實用面積約2,461方呎，依家連有租約，月租23.8萬元。劉Sir聽中原嘅代理講，今次業主有意換貨，所以決定將間屋以1.25億元放盤，雖然賣得出間屋要畀額外印花稅，但若果以意向價賣得出間屋，賺幅不單夠抵銷稅項，仲可以有利潤。以現時意向價計，呎價逾5萬元，成功賣出將會係九龍塘嘅新指標，而間屋成交期喺明年。

本港洋房供應一向緊絀，所以唔單止買賣價好，連租金表現都唔錯，最近港島南貝沙灣3期一幢面積約5,200幾方呎嘅洋房，就以每月約28萬元租出，呎租50幾蚊。

帝景園呎售二萬九

近排股市略為回穩，豪宅交投都升番少少，個別優質單位做價更加挑戰高位，好似中半山帝景園1座極高層A室，面積2,680方呎，近期以7,800萬元賣出，呎價29,104元，係屋苑分層單位嘅新指標。

詩禮兩伙賣逾億元

有業主趁承接力好咗，最近連沽兩個南區詩禮花園單位，套現超過1億元，啱啱賣出嘅高層A室，面積2,363方呎，成交價5,020萬元。九龍站屋苑本月亦錄多宗成交，其中凱旋門朝日閣高層C室以2,760萬元賣出，呎價約2.2萬元。