股海實戰：旺旺隨時發力炒上

歐債危機上周得到暫時緩解，發展富戲劇性，港股就藉此連升六個交易日，恒指最多升約2,300點，上周五收報20,019點，成交增至1,096億元，乃八月九日以來最大單日成交額。中資股成升市領頭羊，手持現金比例較高嘅基金入場追貨，加上冚倉盤帶動，呢轉升市確比想像中強勁。如今歐洲佬將矛頭轉向，想搵中國幫手填氹，但幫得幾多，實乃疑問！

呢轉內房及內銀股升勢甚勇，早前有大量沽空嘅農行（01288），由五十二周低位2.26元挾上到上周五高位見3.9元，空軍補倉補到氣咳。上周五大市沽空額回升至93億元，沽空比率8.5%，牛熊加窩輪佔大市成交18.8%。

熊證街貨單日倍增

本來，阿莊估計今轉反彈浪頂多去到20,500點經已好「盡」，點知驚見上周五恒指熊證街貨單日居然急增一倍，初步估計收回價介乎20,200至22,199點的街貨高達18.65億份，其中約八成集中於20,400至21,599點；反觀恒指牛證街貨尚未成氣候，收回價介乎18,000至18,399點的街貨只有3億份。場內咁多淡友，如今只怕大鱷會繼續推高指數，以「屠熊」為樂！是故若短線恒指回落至19,500至19,700點的話，阿莊會認真考慮追番些少貨，喺預期中資股仍為升市主要動力來源之下，免選股煩惱，可能會從安碩A50（02823）入手。

展望本周，G20以及美國聯儲局勢成市場焦點。暫看恒指再上20,300至20,500點乃一阻力區，而回吐則須考驗19,500點水平承接。

內需股可繼續睇好

歐美市場難寄厚望，明年中國出口仍未許樂觀，宏觀政策須繼續透過刺激內需，以維持經濟持續穩快增長。最近財政部加快稅制改革，有助提升企業盈利，包括財政部等三部委又聯手制訂措施搞好明年消費大局，以好好利用內地工資按年增逾兩成嘅消費動力，長線內需股可繼續睇好。

與其追入內銀及內房股，阿莊建議留意與內地居民生活息息相關嘅內需股，事關未來兩個月內地CPI增長將回落至4至5%，相信糧油食品可以擺脫凍價令，產品提價消息可刺激股價表現。上周分銷散裝食油嘅中國食品（00506）有異動，食品股則可以(目及)實旺旺（00151）。

上半年，旺旺嘅純利同比持平，毛利率跌5.1個百分點至33%，反映經營成本上升嘅壓力，若年尾旺季可調高產品零售價，有助紓緩毛利率壓力。

再睇股價走勢，去年末季以來基本上維持喺6至7.8元水平上落，若提早反映通脹數據回落及銷售旺季來臨的利好因素，未來一、兩個月股價有勢向上試破上落通道頂部，7元邊可小注。