樓市出更：工廈改酒店最快活

工廈活化措施將延長多三年，其實唔少投資者同工廈業主都深知本港旅遊業愈嚟愈旺，將物業改裝做酒店絕對有利可圖，所以舊年四月起正式接受活化申請以來，佔大多數申請都係打算改建做酒店。根據最新數字，城規會呢一年半以嚟已經處理11宗工廈改裝酒店申請，至今批出咗其中7宗，提供房間總數多達1,683間。

近期工廈業主改裝酒店申請嘅速度真係愈嚟愈快，劉Sir發現，其實措施執行頭一年只係得兩宗申請獲批，而至今順利過關嘅7宗同類個案，有5宗係最近半年先批出，單係今年六月獲批嘅葵涌葵昌路100至110號運通製衣大廈，房間數目就多達564間，為最大宗申請個案，有關業主喺上個月仲遞交咗修訂申請，建議將房間進一步增加約6%至598間。

「波叔」兩工廈准改裝

大部分工廈改建酒店申請都集中喺九龍，搞緊市區重建嘅觀塘區更加係改裝酒店嘅熱點，7宗獲批申請當中就佔咗4宗，好似近期頻頻大搞活化嘅資深投資者「波叔」鄧成波，旗下嘅觀塘偉業街164號凱康大廈同埋偉業街133號長輝大廈，就雙雙喺上個月闖關成功，獲准改裝分別為21及14層高酒店，提供110及286間酒店房。

德信縮規模終過關

唯一一宗被城規會拒絕嘅改裝酒店申請，係上年七月被駁回嘅觀塘鴻圖道28A號德信工業大廈，當時建議提供110個酒店房間。不過，上址經過縮減規模後已經喺今年四月獲該會通過，房間數量減至98間。另有3宗延期處理個案，則全屬葵涌工廈，涉及酒店房間679間。

唔係幢幢工廈足十五年樓齡就可以向地政總署申請特別豁免書，原來有條件限制，部分改裝後嘅新用途要過城規會一關，先可申請豁免，好似「工業」地帶內嘅「辦公室」及「商店及服務行業」用途，同「商貿」地帶內嘅「酒店」用途。