Fundman睇市：和黃反彈走勢未完

前晚，美國公布十月份消費者信心指數，由九月的45.4跌至39.8，返到兩年半來最低，意味美國消費者對經濟及就業前景的睇法，悲觀程度差不多回到○八年金融海嘯時水平，亦因為咁，美股唔等G20峰會結果，道指帶頭插低逾兩百點收市。

近期，市場對聯儲局推出QE3的期望愈來愈大，投資者押注歐央行同IMF為歐債危機救援方案拍板後，就會見到伯南克再開動直升機撒銀紙。眾所周知，美國消費市場佔全國經濟比重三分之二，消費信心屢創低點，可以推斷經濟好不到哪裏。然而，目前道指及納指居然較海嘯時低位6,469點及1,265點，仲有80.9%及108.5%升幅，一葉知秋，數以千億美元計的QE1及QE2，到底是幫了普羅大眾還是金融才俊？看官自是心裏有數。「佔領華爾街」活動有愈演愈烈之勢，相信亦係聯儲局遲遲未敢出招推QE3的原因之一，到底是預視未來的股市太樂觀？抑或消費信心快將見底回升？暫時筆者認為是前者成數比較高。

從緊政策有鬆動迹象

尋日港股低開後，跌幅不斷收窄，下午更愈升愈有，倒收98點收市，跟A股先跌後升之外，內銀股第三季業績前挾淡倉持續，都幫了很大忙。溫爺爺日前到天津考察，見到企業水緊苦況，表示政府會「適時適度進行預調微調」，市場解讀為，一面倒的從緊政策，可能會轉向更彈性地處理。尋日睇到幾份策略報告，大行普遍認為礙於通脹企穩6%樓上，樓市只係高位橫行而不肯回落，加上一收就死的中國貨幣政策「往績」，或者較具影響力的放寬政策，仲係要等到明年第一季前後方會出台。不過，至少可以相信再收緊的機會已微乎其微。

商務部決定以中國反壟斷法，把美國Yum!收購小肥羊（00968）的反壟斷申報審查期延長六十日，市場怕小肥羊會成為當年可口可樂收購匯源（01886）事件的翻版，股價急挫0.76元，報5.34元。收購一間火鍋連鎖店，很難想像反壟斷審查上會遇到阻滯，不過匯源事件在前，由股價昨日急跌後，與Yum!的出價6.5元比較，潛在回報擴大到21.7%。表面上，小肥羊股價在收購消息公布前報5元左右，以輸6.4%的風險博贏21.7%，三倍賠率博得過，但要留意餐飲股四月至今，普遍跌幅唔細，假如臨門撻Q，5元未必頂得住也。

和黃（00013）向來是資產魔術師，能夠把握時機高賣低買，趁住歐債危機，傳超人對澳洲及愛爾蘭電訊資產食指大動，據彭博報道，和黃向法國電訊及私募基金，磋商收購奧地利「橙」（Orange Austria）。九九年和黃以天價賣橙，業績賺過千億，之後歐洲3G經歷十年艱苦經營，今日先因為智能手機普及，開始步入收成期，估唔到法國電訊要出清非核心投資，令和黃又有機會可以低價回收。

大行估計，奧地利「橙」要價大約9至9.5億歐元，其去年營業額及EBITDA分別係5.78億及1.85億歐元，比奧地利本身的2.07億及2,200萬歐元規模要大，能夠低價整合，營運效益上對和黃肯定有利。尋日美銀美林報告畀和黃78元目標價，較資產淨值折讓28%，筆者都相信今浪由93.1元跌下來的和黃，反彈應該未完。