股海實戰：TCL通訊有「錢」途

歐盟峰會消息多多，搞到前晚歐、美股市大幅波動，股民有得震冇得瞓。港股尋日隨美股低開，最低見過18,705點，之後喺18,800至18,900點水平徘徊，跌唔落又再挾過，午後踢穿萬九點，高位做19,106點，收報19,066點，升98點，成交略增至640億元。

尋日中資股成升市動力來源，皆因溫總話宏調要「適時適度進行預調微調」，A股亦做好。之不過，別忘記溫總講呢番話嘅大前提係要繼續控制好物價，相信針對內房嘅調控政策唔會放鬆，只係再進一步收緊銀根嘅可能性可排除，故別因此話而變得過分樂觀。

調低今年銷售目標

TCL通訊（02618）公布第三季業績，純利2.14億元，同比增幅僅6.4%，毛利率同比降3.4個百分點，至20.8%。值得留意，受到外圍因素影響，部分客戶嘅定單延遲，加上須預留產能予智能手機業務，故公司調整今年全年銷售目標，至4,400萬部。

翻查資料，管理層喺中期業績時仍言之鑿鑿話維持全年銷售目標五千萬部，但季績披露，公司首九個月總銷量為3,045萬部，要實現原定目標實在有難度，調整不失為務實嘅做法，但就無可避免令短期股價添沽壓。

歐、美市場不景氣，對當地市場佔總銷量逾八成嘅TCL通訊來說，唔多唔少有一定影響。季內，中國市場銷售量同比大增71%至接近300萬部，可惜佔收入比重仍然有限。管理層預期，明年智能手機銷售將會有突破，能否如期報佳音，就要拭目以待。

未來數年內地工資會按兩成以上年增長遞增，勢必帶動個人消費，近日商務部、財政部及人行就聯合發文，要求做好十二五擴大消費工作，內地電子消費品市場前景可看好。

保守假設末季純利僅及第三季嘅一半，TCL通訊現價一一年度預測市盈率約5.2倍，某程度已反映業務風險，往後表現要視乎智能手機業務及內地市場表現，估計中期股價波幅介乎2.8至3.8元。