東九商廈盤加價唔執輸

施政報告就提到要銳意將九龍東打造成為第二個核心商業區，消息令區內商廈業主振奮，除咗億京嘅觀塘敬業街55號商廈率先喺下個月初每方呎加價約150元；劉Sir亦聽聞，觀塘、九龍灣及紅磡商廈放盤亦普遍加價約2%至8%，好似九龍灣億京中心A座高層向海戶，不足半個月加價約8%，叫價每呎約9,000元，有望創區內新高。

億京發展項目策劃經理黎裕宗話，政府將九龍東打造成為另一核心商業區，喺目前市況放緩下，無疑對業主有鼓舞作用，相信租金持續上升之下，亦會推動價值上升，業主更善價而沽。

佢話集團旗下嘅敬業街55號商廈餘貨，下月初就會每方呎加價150元，至於萬兆豐中心亦會跟隨喺短期內加價，但加幅仲未落實。

億京中心搶先加價8%

自從今個月中好消息公布後，九龍東一帶嘅商廈業主普遍認為，未來區內做價應該可以睇高一線，唔少放盤已即時加價，好似億京中心A座一個高層全海景戶，面積約4,500方呎，早前意向呎價維持約8,300元，最近業主看好後市，已調高叫價去到每方呎約9,000元，勢創該區新高呎價，涉資約4,050萬元。

萬兆豐叫高近半成

而觀塘萬兆豐中心高層二手單位，依家開價約1,720萬元放售，呎價約8,600元，較今個月初意向價調升約4%；另外，紅磡區紅磡商業中心中層戶目前最新叫價約1,150萬元，亦比早前叫價調升約4%。

由於部分買家擔心遲入市會買貴嘢，所以近期已「急急腳」入市，聽聞敬業街55號商廈過去兩個星期已賣出超過10個一手單位，為近排罕見。