Fundman睇市：數碼通最啱儲貨收息

星期日，G20首輪峰會無重大議程落實，但市場對星期三終極討論，針對銀行資本重組及融資方案，似乎仲係充滿期望，尋日港股高開後全日由頭升到尾，沽壓唔大，恒指升746點，收報18,771點，可惜成交得613億元，作為今年第二大升幅交易日，唔講得上配合，可見基金經過八、九月海盜船一樣的市況之後，入市態度極為審慎，情願少做少錯。

查實歐元及環球股市，第三季累積相當大的空倉，G20峰會前後來一次淡友大清洗，一啲都唔奇。可是，希臘削債五成，IMF為銀行補充1,000億至1,500億歐元資本需求，以及將EFSF永久救市機制規模擴大到9,400億歐元，是否代表所有危機迎刃而解？老實講筆者無咁樂觀，一旦賴債，市場勢必猜「歐豬」中邊個會成為下個希臘，如何可以給予市場信心，至少確定希臘同幾隻「歐豬」之間，會有個有效防火牆甚為關鍵，睇番意大利國債五年期違約掉期，由九月底高位534點子回落到執筆時的440點子，但同六月時約170點子，或者德國目前的90點子相比，高出幅度仍令人不安。

或者有人話意大利國債持有人太悲觀，但筆者認為，如果以為G20幾日後可以咩都解決晒，股市可以上番年初水平，咁至係太樂觀。

內銀股業績成焦點

講番港股，未來幾日焦點，勢必在內銀股第三季業績身上，瑞銀估綜合今季內銀股平均盈利會錄得按年增長30%，但按季僅升2至3%，不過無緊要，所謂跌得急，挾得狠，國企金融股指數今年跌30.1%，跌幅遠大於國指的23.4%，挾倉唔揀內銀真係無咩好揀，業績中打頭陣係今日出成績表的重農行（03618），跟住到周三的中行（03988）、農行（01288）及中信行（00998）；周四工行（01398）、交行（03328）及民行（01988）；以及周五的建行（00939）及招行（03968），看官們不妨留意。

今浪反彈，史提芬最後悔係無把握機會低吸高息電訊股數碼通（00315），由九月十九日，股價見18.5元的新高後，其股價的波動認真誇張，月初跌至9.8元，較高位跌掉47%，再反彈到尋日15.18元，升番54.9%。

4G推出帶動盈利

歸根究柢，數碼通成交唔多，八月前平均每日得一百幾十萬股，九月基金為應付贖回風聲鶴唳，這類跑贏大市的outperformer，隊起上嚟更加唔係人咁品。

本地流動數據用量估計仲有幾年雙位數增長，隨着LTE（街外俗稱4G）未來一年推出，月費客戶ARPU有繼續改善空間，坊間估計數碼通在現時7.5億元的盈利基礎下，未來兩年可進一步升至9.1及10.56億元，相當21.3%及16%增長，這高息股，以現價15.18元計，預期息率達5.6及6.4厘，筆者相信15至16元是相當合理水平，股市風高浪急加上全球零息期可能比預期更長，儲來收息好過日日食驚風散。