股海實戰：文化中國買定等運到

歐盟峰會拯救方案本周三揭盅，炒家把握此前機會挾淡倉，恒指一度抽高至18,826點，收報18,771點，升746點，但成交僅613億元，反映大部分投資者選擇按兵不動，免入場高追接火棒。

滬綜指昨日亦回升逾2%收市，發改委指未來兩個月CPI將低於5%，顯示通脹確認受控。另外，十月份滙豐中國PMI初值重上盛衰警戒線，達51.1，數據顯示中國經濟將軟着陸。難怪尋日港股中資能源及資源股亦奮力一彈，國企指數表現跑贏恒指，升幅達5.4%。

斥資20億全購中娛

上周阿莊提到，十七屆六中全會審議並通過有關深化文化體制改革，推動文化發展等問題嘅決定，咁啱近日傳來文化產業一宗大交易。事緣文化中國（01060）尋日復牌，並宣布斥20.16億元全購中國娛樂傳播，代價將按每股0.4元發行50.4億股新股支付；同時，騰訊（00700）以同樣價格認購文化中國6.19億股新股，完成後持股約8%股權，大行瑞信出任財顧。

文化中國本身從事移動新媒體、印刷媒體及影視業務，主席董平喺中國電影業投資有江湖地位。今次公司用廿億全購嘅中娛，主要喺內地從事製作及批授電影、電視劇及衞星電視節目，以及電視廣告業務，去年初成立時已引入著名基金「紅杉資本中國」為股東，但由於中娛缺乏往績參考，故今次交易作價高低見仁見智，反正交易代價全以公仔紙支付，兩者都冇蝕底。

更能吸引投資者目光嘅，當然係成功引入騰訊為股東。還記得今年初騰訊成立50億元產業共贏基金，今次入股文化中國，相信係睇好其擁有傳統媒體、手機媒體、影視內容嘅多元化綜合內容平台。至於文化中國，今次引入騰訊為股東，既可沾其名氣、分享其於互聯網平台嘅優勢，亦可籌集2.45億元資金，何樂而不為？

有望成炒家目標

去年阿莊亦曾買賣文化中國，故對公司今次交易亦深感興趣。回看其股價由去年九月高位0.96元最多曾回落七成，正反映產業政策未能跟上企業發展，以及期間股市的調整。今次收購及認購完成後，公司嘅發行股數會增至77.42億股，一旦明年內地文化產業投資概念成氣候，呢隻股勝在「晒士」較大，加上主要股東有分量，唔難成為炒家目標。

尋日公司復牌股價先高後低，反映市場氣氛有待醞釀。阿莊對明年文化產業板塊興起有憧憬，眼見呢間公司嘅發展格局對辦，短線會（目及）實0.4元邊承接，唔排除會跟進QQ入場買些少放喺倉底做種，等明年呢個板塊時來運到，可以先飲頭啖湯！