南灣豪宅地送個墓

即將喺今個禮拜五截標嘅港島南灣道近35號豪宅地，尋日地政總署突然喺網頁公布，話幅地範圍內山坡有一個墓地，劉SIR都嚇咗一跳；測量師老友話，幅地會一併同相連嘅山坡重建，屆時個墓地會「消失」，所以無影響，仲話幅地呎價可以作4.9萬蚊一呎，有機會挑戰本港政府賣地呎價新高。

地政總署喺網頁公布南灣豪宅地最新資料便覽，話幅地賣地章程附連圖則標示範圍內有墓地，不過裏面就「無料到」，同時強調便覽只係向準買家提供資訊，並不構成公開招標出售該地段嘅土地詳情及賣地章程嘅一部分，咁即係變相買地「免責條款」。

事實上，南灣道近35號呢幅地早响○四年就放在勾地表內滾存至今，喺政府主動推地下，終於有機會面世，點知臨截標先發現買豪宅地送墓地，真係嚇親。

擁海景料建花園洋房

第一太平戴維斯陳超國話，南灣豪宅地盤範圍內有墓地，會唔會影響地皮價值，就要視乎墓地位置，同埋大小，所以答唔到會唔會調低地皮估值。

不過，韋堅信測量師行林晉超就話，由於依家建築物同墓地位置喺地盤平整之後，應該都會「消失」，所以覺得對地皮估值應該無影響。佢話，以南灣道係傳統豪宅區，擁有海景，相信發展商或者用家會將地盤建成花園洋房或獨立屋。

樓面地價或超山頂地

佢相信入標發展商或用家數目唔少，估計地皮市值達6.38億，每方呎樓面地價逾4.9萬蚊。有機會高過○六年新地（00016）以每方呎4.2萬元投得的山頂加列山道12號地皮，成賣地呎價最貴地皮。

另外，同日截標嘅沙田石門安耀街與安群街交界商貿地，林晉超就估值達8.6億元，每方呎樓面地價1,998蚊，兩地皮加埋應該可為庫房帶來15億進帳。