港交所搞新意開市增敲鑼

港交所（00388）交易大堂剛剛續咗約就搞搞新意思，由依家開始，上市公司每逢上市周年紀念，又或者係公司嘅重要里程碑，好似創立日等等，只要「科水」3.8萬元，上市公司老闆同埋其邀請嘅嘉賓，就可以主持港交所開市儀式。港交所仲新設「敲鑼」環節，到時真係夠晒熱鬧！整個儀式嘅錄像同相片，仲會上載到港交所網站。

交易大堂準備大翻新

交易大堂依家正進行規劃準備裝修，二○一三年交易大堂翻新後，開市儀式更會升級。但點樣加料，就要拭目以待。

除咗開市儀式外，港交所依家仲計劃每月喺交易所會議廳舉辦研討會，邀請相關行業、板塊或主題嘅上市公司代表出席，講解公司嘅最新資訊。當然不包括股價敏感資料喇！呢個世界當然冇免費午餐，每間上市公司盛惠2.8萬元。

研討會有一定賣點，初步構思係會集合同一板塊嘅公司，好似係5至10家，港交所會安排邀請分析員、經紀、機構投資者、同其他市場專業人士等嚟聽，對公司嚟講算幾方便！