Fundman睇市：潤泥目標進身藍籌

前日，法國總統薩爾科齊與靚女老婆布魯尼弄瓦之喜，不過，這位新爸爸認真唔得閒，剛剛探完囡囡，就要立刻飛去德國法蘭克福，同默克爾夫人及IMF商討擴大EFSF規模，可惜德國同歐央行，似乎無興趣將四千多億歐元規模的EFSF，透過槓桿五至十倍，去畀市場見到佢哋一次過「玩鋪勁」嘅決心，環球股市未等到G20開會結果，多少已體會到歐洲幾個老大哥好似散沙一樣，美股前晚因為咁而由升轉跌。政治市永遠「蝦人」，唔想冒險，等埋G20救市措施水落石出至入市都未遲。

港股成交愈玩愈縮，昨日得番528億元，減埋窩輪同牛熊證近191億元，可見基金經理一樣靠邊站，實行少做少錯，大市沽空成交61.5億元，沽空比重由前日的7.59%反彈至11.66%，跌市沽空不跌反升，並唔係好兆頭。一日恒指唔能夠升穿50日線阻力（19,001點），後市仲係反覆尋底格局。

內房股難有好表現

九月內地銀行新增貸款4,700億元人民幣，創二十一個月新低，通脹企穩6.1%，同樓價一樣死都唔落，教人行無辦法立即再開水喉去刺激經濟。當愈來愈多人驚中國經濟在宏調措施下硬着陸，銀監會主席劉明康日前在北大演講，話經過內部壓力測試，證明即使內地樓價下跌四成，銀行業風險仍在控制之內，本來言論話畀大家聽內銀企業有「幾咁安全」，但內地市場卻解讀成為銀監會預告樓市最壞可以跌四成，AH內房股大插水，恒大（03333）跌7.1%、潤地（01109）跌6.7%、保利香港（00119）跌4.8%、雅居樂（03383）跌4.6%。

睇番恒大及雅居樂的可換股債券，孳息率由十月初高位回落，但去到近一星期經已拒絕再跌，彭博系統上顯示息率有23厘及13.1厘，試問買CB理論上都可以4.3年收番本金，大孖沙又點會肯喺四倍PE樓上掃入正股？內房股融資成本一日唔回落，估值想升高些少都好難。

認識的華潤系內高層，都希望有朝一日，能夠一門四傑齊齊進駐藍籌之列，華潤水泥（01313）似乎正朝着這方向進發，繼續透過收購擴大產能，剛以2.92億元人民幣（約3.6億港元），收購福建漳平振鴻水泥一條日產能2,500噸的熟料生產線，相當年產能力77.5萬噸，另外還有兩條年總產能100萬噸的水泥粉磨線。

收購規模，大約等於潤泥六月底熟料年產力3,760萬噸的2.1%，唔算大，回顧中期熟料產能處超負荷，生產線利用率達116.7%，故繼續透過收購擴展是可以預期。而今次亦係去年十一月至今，繼廣州、福建、山西及蒙古之後，第五個地區收購。

今年潤泥股價跌12.7%，跌幅遠低過同期恒指的21.9%，亦因此，假如今日立即把潤泥加入藍籌，其市值335億元，比思捷（00330）、中鋁（02600）及中遠太平洋（01199）大，僅奀過中信泰富（00267）的437億元。

不過，恒指服務公司也非單看大細，內地經濟硬着陸風險，市場對水泥價格在基建及私樓興建高峰回落下的憂慮，都會影響潤泥業績，以至未來進身藍籌的機會。