股海實戰：中升盈利有保證

近年聽到唔少有關「世界末日」嘅言論，睇見呢排港股成交陰乾，大部分股份股價反彈乏力，一浪低於一浪，金魚缸嘅境況確實予人有點「世界末日」之感！

咁啱得咁翹，始創「金磚四國」概念嘅高盛資產管理主席奧尼爾，近日提到歐債危機時亦直言，若二十國高峰會未能推出實際嘅拯救方案，就等於「世界末日」！大概德國及法國應該識分輕重，再係咁糾纏落去，只怕全世界都會係輸家！

今日市況更趨淡靜

正由於擔心歐債危機，尋日亞洲區股市普遍向下，港股呢期人跌佢跌，仲要跌得多過人，恒指尋日一度跌逾500點，低見17,782點，收報17,983點，跌326點，成交僅529億元。雖然期指大高水85點，但今日市況應會更加淡靜，事關全球焦點都放喺周日嘅歐盟峰會身上。

尋日大市沽空額大幅增加至61億元，沽空比率又回升至11.6%，而窩輪及牛熊證佔大市成交比例雖然有所回落，但仍高達36%。總而言之，呢啲市入場只會畀班大鱷撳住嚟砌，看官宜繼續抱觀望心態，現金為王，為未來一年全球經濟進入另一次重大逆境作好準備。

用嚟炒股嘅鑊鏟可以暫時放落床下底，但有時間仍可為實力股做吓功課，畢竟雨後總會天晴。尋日個股消息留意到中升集團（00881）披露，隨着日本地震影響逐步消除，日系豪華及中高端品牌汽車喺內地嘅銷情恢復，今年第三季公司共銷售新車約4.4萬輛，同比增長超過六成；另售後業務收入超過9億元人仔，同比增長逾七成；而今年首九個月，新車銷售收入及售後業務收入均已超過去年全年水平，顯示業績保持快速增長。

站喺全球經濟嘅角度，今年第四季可能係全年表現最差嘅一季，好在內地市場幾差都好，斷唔會衰到一架豪華車都賣唔出嘅地步。既然公司首三季收入已平了去年全年嘅水平，即係話今年業績已有保證。至於明年上半年，變數仍多，但相信公司有能力應付挑戰，上月底宣布新收購亦有助擴大收益基礎。再睇過去三個月股價大幅調整，估值已回落至相對合理水平，預測中期股價主要波幅介乎10至13元水平。