新盤好賣貨尾僅增千伙

政府將會喺今日公布按季私人住宅供應量，有地產代理就率先預測一手貨尾最新存量，雖然近幾個月新盤依然熱銷，但由於好多發展商早排趕住喺施政報告前出貨，所以推盤態度亦見積極，令到截至今年第三季貨尾存量料按季升咗約兩成，去到約6,000伙，重返今年首季水平，而恒隆地產（00101）喺○四年入伙嘅奧運站浪澄灣，由於有大批單位遲遲未拆售，所以貨尾量高約1,224伙，佔總貨尾量約35%。

劉Sir尋日收到代理老友提供嘅數據，發現今年首八個月落成而尚未賣出嘅一手私人住宅現樓單位有1,846個，連同二○一一年以前落成而尚未賣出嘅單位約4,000個，估計第三季累積待售現樓一手單位約有6,000個，雖然比上季多咗1,000個，但都算係低位。

全年新盤登記料萬一宗

預計今年全年落成私人住宅有10,701個，其中尚未推售嘅單位佔3,509個，貨尾單位就817個，即係待售單位有4,326個，而賣出嘅6,375個單位，佔全年預計落成量約六成。

至於登記銷情量方面，今年首九個月，登記一手私人住宅銷售宗數7,186宗，預計全年登記數字可以達到11,000宗水平，數字比舊年減少約1,500宗，係有紀錄以來嘅第二低，僅僅高過○八年嘅9,955宗。

華懋餘貨賣剩三百伙

其實好多發展商依家嘅貨尾存量已去到新低，華懋售樓部經理吳崇武話，佢哋集團依家貨尾量得番約300伙，其中沙田碧濤花園佔106伙、馬鞍山迎濤灣及青山公路傲庭峰分別佔15伙同28伙，而深水埗寓．弍捌就佔49伙，相信未來一手貨尾總存量仍會維持响低水平。