股海實戰：海爾電器家電股首選

今年以來，內地收緊市場流動性，A股表現持續不振。數據顯示，上月大部分QFII呈淨贖回情況，整體資產規模不斷縮水。A股何處是底，係海內外投資者最關心嘅問題。阿莊認為，從第三季度M1同比增幅為8.9%，遠低於市場預期嘅平均數12%，以及CPI增幅連月回落，說明緊縮政策開始收效，如今只待房地產市場出現一次較全面嘅調整，則A股市場有望在明年中前重納升軌。

唔單只A股，香港金魚缸亦水盡鵝飛。尋日恒指波幅兩百多點，大市成交僅575億元，再睇牛熊及窩輪佔大市成交比例創新高，達41%，加埋股票沽空額43億元，以及期指相關對沖盤，七除八扣，大市實際成交可能低於三百億元。缸邊友睇多過做，再係咁落去，今年可以提早收爐！

文化產業股前景佳

十七屆六中全會喺十八日完結，會議審議有關深化文化體制改革，推動文化發展等問題嘅決定，被視為文化產業發展嘅里程碑。業界估計未來五年文化產業嘅規模將達到2.8萬億元人仔，相等於○九年底嘅三倍多。

目前港股中，亦有唔少從事內地文化產業嘅公司，如財訊（00205）、文化中國（01060）、新華通訊頻媒（00309）、以及剛獲新華社注資嘅進業控股（08356）等，但多半係唔起眼嘅細價股。如今國策方向明朗化，待有具市場地位嘅龍頭公司加入助陣，呢個板塊可成氣候。

個股消息方面，八月宣布與凱雷投資旗下Hawaii Asia合作嘅海爾電器（01169），近日與英國大型家居用品及百貨零售商Home Retail Group成立合營，喺內地發展多渠道百貨零售業務，海爾佔股51%。合資公司將全資擁有一家將於內地以「Argos」品牌經營多渠道百貨零售業務嘅內地公司，首期投資額約2,950萬美元，其中1,500萬美元由海爾出資。

海爾行呢一步，有助加快拓展終端銷售市場，發展多元品牌、產品及多渠道銷售，如網上、電話及電視等。阿莊亦相信，內地家電商要保持龍頭地位，及時布置捕捉新銷售模式嘅商機，十分重要。

事實上，家電商亦不能老是靠產業補貼政策打救，要打破製造業務競爭大、毛利低嘅局面，自行加強開發零售市場，創新業務模式，係正確嘅發展方向。透過引入海外資金及海外合作夥伴，海爾正逐步提升競爭能力，長遠有望拋離其他本土競爭對手，可視為家電股嘅首選。