樓市出更：舖市趕出貨輸少當贏

年終將至，銀行都準備埋數收爐，條水喉比之前閂得仲實，唔少揸住工商舖物業嘅投資者都寧願輸少當贏，最緊要出到貨。有經紀老友幾日前同劉SIR講，一向係汽車維修同五金商戶集中地嘅荃灣享和街，依家有個單號舖放盤，業主要錢唔要貨，帳面隨時唔見八十萬元，先可以甩身。

有投資界老手話，銀行唔肯放水（承辦按揭），想入市嘅買家要抬差唔多五成樓價做首期，仲要等佢地審批，等得嚟個市已經唔同晒，所以唔少工商舖業主減價吸客，平手離場又好、蝕少少又好，都好過擺件貨喺度，日日唔見錢。

荃灣舖減價4%料損手

好似啱啱講嘅荃灣享和街單號舖，業主今年三月以約1,880萬元購入，早前已減價放售，依家叫價調低至大約1,800萬元，減價80萬元，減幅超過4%。

另旺角砵蘭街亦有單號舖開價約2,100萬元放盤，寧願平手離場。商廈方面，中環嘉寶商業大廈中層戶現開價約1,170萬元，亦較月前買入價低逾3%。

商舖虧損今季續有來

美聯工商舖行政總裁黃子華話，今季可能仲陸續有工商舖虧損成交個案，估計銀行今年內放寬按揭嘅機會唔大，工商舖牛皮局面可能延至今年底。

舖壇資深投資者黃海明都認為，個別投資者願意以平少少出貨，但係銀行唔放水，買家都有心無力，所以估計今季商舖摸貨量有機會創近年新低。