股海實戰：揸現金最實際

美股前晚低收，周日歐盟峰會前德國又主動潑冷水，再加埋內地第三季GDP增長遜預期，市場氣氛一下子全面轉淡，恒指昨日低開見18,411點後跌勢未止，中午前已失守18,300點水平支持，全日低位見17,963點，收市險守萬八點，報18,076點，跌797點，成交631億元。

本來預期恒指今浪會一試50日線19,100點水平，先至掉頭玩上落，誰知利淡消息忽然蜂擁而出。見尋日沽空比率回升至9.1%，美匯指數反彈，投資市場避險情緒又再升溫，空軍又再試沽。參考八月底九月初港股反彈至50日線前掉頭再展新跌浪，若恒指短線確認失守萬八點關，要有心理準備月底期指結算前，恒指要再度探底。

A股短期展望難樂觀

內地第三季度GDP增長9.1%，連續三季增幅放緩，但阿莊認為，數據顯示下半年中國經濟硬着陸之論不成立，咁應該唔係壞消息，偏偏尋日A股都要照樣向下，反映A股投資者信心已大不如前。聽表叔線話，中央傾向喺十八大前繼續維持貨幣政策穩定，唔會有咩大動作，最多都係好似處理溫州民間借貸事件咁，見招拆招。換言之，內地銀根趨緊嘅情況可能要持續至明年，而A股中短期展望亦難太樂觀。

尋日阿莊先至話，面對近期內房股反彈亦不為所動，昨日就見呢個板塊全軍盡墨，彈得愈快嘅跌得愈甘，證明繼續睇淡方向正確。在此奉勸尚持重貨者，要認真評估自己的持貨能力，別再錯失沽貨的最後機會。

此外，呢頭講完隻安踏（02020）咁多大行唱淡難有運行，嗰頭見到尋日股價再挫15%，其他如特步（01368）亦跌11%、李寧（02331）、361度（01361）及匹克體育（01968）跌幅介乎6至8%。正所謂莫買當頭跌，別與錢作對！

尋日傳來大企業供股消息，新世界發展（00017）同新世界中國（00917）宣布供股計劃，消息公布後股價齊齊插水。大股東鄭裕彤家族選擇喺呢個時候供股及參與包銷供股，自然有其打算。仲記得上次新世界供股係喺○四年，即係沙士以來嘅低潮，今次就可以視為○八年金融海嘯嘅低潮。

阿莊唔敢講股市係咪經已處於最壞時候，但睇見班華資大戶如李嘉誠、李兆基、郭氏家族，鄭裕彤，呢年都無懼跌市，不斷向系內公司投入資金，呢個現象究竟說明甚麼，兩年後掉頭回望可能會睇得更清楚，而呢一刻最重要係保留實力，耐心等待。