「辣招盤」入伙有租無炒

額外印花稅措施推出後，樓市炒家即刻「無晒影」，但長線投資者就繼續入市買樓收租，劉SIR聽代理老友講，市場上兩個「招後」開售同入咗伙嘅新盤，長沙灣御滙同元朗泉薈，原來至今都未見有任何二手買賣放盤，但租務交投就非常咁活躍，其中全幢只係得96伙嘅御滙，入伙後有六成單位放租，依家有「半幢」單位成功租出咗。

御滙係額外印花稅措施推出之後開售嘅新盤，所以轉售須繳付額外印花稅。劉SIR聽代理老友講，呢個夾埋唔夠100伙嘅單幢盤，自今年六月初入伙以來，到依家亦未聽過有任何二手買賣放盤同成交，但放租盤居然有成60伙，到依家已經有接近50伙成功租出，即係成幢物業有約莫一半單位成功租出，月租仲要成8,300至1.2萬元，呎租22至逾30元，目前仍有約10個租盤，平均每方呎叫租25至30元。

御滙租盤多 二手無市

佢仲話，御滙租務交投暢旺，反映咗樓盤吸引大量長線投資者入市，同時，即使二手放租盤源充足，但係租金水平仍相當理想，好明顯係市場租務需求好大，所以租金明顯比二手高，目前御滙平均成交呎租要成27至28元，較同區樓齡只有三年嘅海峯二手平均呎租約23元，足足高咗20%。

泉薈呎租貴同區兩成

至於新地（00016）喺今年初開售嘅元朗泉薈，係額外印花稅措施推出後首個開售嘅中小型住宅新盤，聽代理講，呢個盤喺今年七月開始交樓入伙，受額外印花稅措施影響，到依家仲未出現任何二手買賣成交，同時都係「零」買賣放盤，不過，租盤成交同樣理想，到依家為止錄到約莫45宗租務成交，平均呎租約13元，較同區其他二手屋苑嘅平均呎租約10至11元，亦足足高咗20%。