股海實戰：思捷提防彈完再跌過

港股尋日裂口高開，升至18,900點水平就冇力，但即市回吐至18,600點水平以上亦跌唔落，大市成交僅626億元。見大市沽空比率7.9%，空軍未再有大行動，估計短線恒指會維持上落格局，靜候消息作出突破。

上星期施政報告話要發展東九龍做核心商業區，早喺區內購入土儲嘅信置（00083）股價連日做好，尋日再升3.95%，收報12.1元。不過，其實東九龍嘅發展規劃五年前已定，唔少大地產商呢幾年都積極喺區內插旗，今次施政報告舊酒新瓶，竟又可當新措施炒一轉，真係奇怪！

另一方面，近期內房股持續反彈，阿莊仍不為所動，冷眼旁觀，特別係見到近日內地多個城市首次房貸利率上調，反映銀行認為內房市場風險上升，咁落去，內地樓價唔跌都難，唔想接火棒，就無謂多手！

大行唱淡 安踏冇運行

上周五安踏（02020）股價急挫14%，有指與上周四摩通嘅報告唱淡有關，但何解上周四唔跌要等翌日先跌？更何況摩通將安踏目標價調低兩成，但調整後目標價仲有9.4元，斷估未足以令安踏股價大挫。反而，尋日瑞信發報告唱淡體育用品股，並將安踏目標價大幅調低54%至6.8元，劈價劈得咁狠，有春江鴨上周五率先入場沽貨，似乎較可信，難怪尋日安踏股價反而唔係跌好多，僅3%，之但係咁多大行唱淡，都係難有運行！

同樣被大行一致睇淡嘅係思捷環球（00330）。上月下旬股價低見7.55元後反覆回升，呢兩日更出現10日線升穿20日線嘅黃金交叉訊號，尋日收報12.52元，升7.9%，係咪真係買得過呢？

阿莊亦唔想阻人發達，但就認為買股票目的係去分享企業成長嘅賺錢機會，多於鼓勵人進行極短線嘅炒賣活動，如同賭大細。睇番思捷呢排股價上升，係喺極度超賣之下作出嘅技術性反彈。

至於話有消息指，公司擬打算剝離虧損嘅美國業務，但求壯士斷臂挽回投資者信心，不過，其實即使成功止蝕美國業務，但歐洲市場依然悲觀，至於內地市場，正所謂「猛虎不及地頭蟲」，如今獨資發展成效如何仍有待觀察。橫睇豎睇，仲有咩可以吸引大家下注呢？

整體業務缺乏增長前景，加上藍籌地位危危乎，短線技術性反彈過後，難保股價又再要應付「地心吸力」。呢啲位入市撈貨，無異於自找煩惱，真係睇好內地零售市場，何不直接揀中資零售股？