新地屯門商場食正北水

隨住新界西不斷發展，區內居住人口已經去到200萬，同時跨境旅客人數逐年急增，區內嘅消費力非同小可，發展商新地（00016）早年已瞄準呢個機會，投得西鐵屯門站上蓋發展住宅及商場物業，而站上面嘅商場就啱啱命名為V city，投資額達到25億元，將會喺明年底落成，勢成為西鐵站上蓋首個落成嘅大型商場。

新地尋日邀請劉Sir出席佢哋嘅西鐵屯門站全新大型商場命名儀式，商場命名為V city，將明年底落成，商場共3層，總樓面達30萬方呎，提供超過130間商舖。

耗25億 速達深圳灣

呢個投資額達25億元嘅商場分為六大主題區域，包括潮流服飾、鐘錶珠寶、特色餐飲、電子影音、美容化妝、及大型超市，引入多個本地及國際品牌，其中八成商戶更是首次進駐屯門區，預計商場會在二○一三年首季開幕。

新地代理執行董事黃振華同劉Sir講，V city嘅V，有VIVA即歡呼嘅意思，目標係塑造一個熱鬧又有活力嘅新地標。

由於商場位處西鐵站上蓋，來往深圳灣口岸非常方便，相信落成後每日人流可以超過10萬人次，內地客佔20至30%，估計每月商場總營業額高逾3億元。

名牌爭租 每呎見280元

該公司助理總經理孫雅茵補充，新界西區人口已達到200萬，商場位處西鐵上蓋，匯聚西鐵同輕鐵優勢，料可吸納新界西內龐大嘅需求，故商場推出招租以來，吸引唔少大型品牌洽詢，預料今年底預租率達到一半，明年中將可全數租出。

而商場每方呎租金介乎50至280元，預計每月可帶來約1,500萬元嘅租金收入。

事實上，新地發展嘅西鐵屯門站上蓋項目，將提供7幢住宅，涉及單位2,000多伙，其中住宅第一期已經入紙申請預售，新地早前亦透露，明年農曆年期間有機會推出發售。