短炒倉：粵投憧憬利好消息

經過多日反彈，港股上周五終於都要回一回氣，跌番兩百零點，投資者又面臨人生交叉點，到底係博大市繼續回升，抑或博反彈完成再跌過？自問睇唔通後市的話，保守一點的做法，可以再吼番公用股，睇定啲先算。粵海投資（00270）上周五逆市做好，升5.9%，報4.83元。

雖然市場現時已將粵投與東江水畫上等號，但以截至六月底止中期業績，供水佔集團整體業務的比重約為六成，物業投資則佔約29%，此外還有百貨及酒店。而整體中期純利增長43.7%，至16.17億元，其中供水業務分部業績為14.59億，同比增長僅4%，反而物業投資的分部業績同比增長達85%，至7.07億元，可見除了穩陣的公用業務外，集團亦不乏其他增長動力。

值得留意的是，為期三年的東江水供水協議，將於本年底完結，需要重新訂定，摩通早前就引述粵投管理層指，預料東江水費一二至一四年期間將按年增加5%，並會在十一月中公布，講到似層層。如今十月都已經過咗一半，是真是假，好快會揭盅，一旦屬實，粵投股價勢必水漲船高，隨時有力突破今年高位5.17元，上望5.5元。