Fundman睇市：友邦反彈力度未必夠

周日，20國集團（G20）財長會議結束巴黎會議，會後聲明表示期待歐洲本月二十三日全面方案，能夠更果斷地解決歐元區的債務危機問題，G20承諾確保IMF有足夠資金，確保銀行有充足資本及融資渠道之外，也暗示可能加大歐洲金融穩定機制（EFSF），防止危機蔓延，包括確保歐洲政府會推出穩定利率借貸，銀行資本重組及落實援助希臘等等措施，無論信與不信，G20的聲明至少為全球股市挾淡倉活動，爭取多額外一個星期的時間，睇情況淡友短期難有運行。

美股連升兩個星期，標普五百指數由低位反彈14%，上周五再升20點，報1,224點，值得留意八月急跌之後，五次反彈浪頂止於1,195至1,230點之間，今次如果升穿1,230點，斷唔係1,370點頭肩頂回落的後抽咁簡單，短期有機會向上挑戰1,258至1,300點水平。

重工業股隨時發威

港股情況相似，近期由16,170點低位，連升六日去到最高見18,758點，合共升2,588點，到上星期五斷纜，回吐256點，報18,501點，一旦升穿八月第一個跌浪浪底18,868點，意味着一浪低於一浪的形勢將會改變，史提芬相信，我們應已見了短期一個重要低點。

上星期五，大市沽空佔成交比例有較明顯的回落，去到8%左右，老友賓架陳話，上周中唔單止見長倉基金（long only）開始重新入市，對沖基金亦開始為累積龐大沽空倉股票頭痕，一葉知秋，恒大（03333）可以喺七個交易日挾高66%，邊個板塊會係下一輪補空倉的目標？相信內房、海運及鐵路股外，要留意本周內地GDP及工業生產數字，機械及重工業股份累積空倉都唔細，隨時有機會發威。

友邦（01299）第三季業績對辦，新業務價值2.45億美元創季度新高，比去年同期勁升53%，管理層歸功於針對亞洲消費者壽險保障，以及儲蓄需求的新產品取得成功有關。

數據勝預期，幾間大行都繼續唱好友邦，其中瑞銀以1.74倍企業價值及22.5倍新業務估值，將目標價訂在31.21元。大摩實際啲，話股價未來十五日有60至70%機會做好，美林同摩通目標價一樣係32元，評級買入及增持。不過，上周五友邦股價反高潮，全日高位亦即係開市價24.8元，最低被掟去到23.3元，收報23.9元仲要跌0.5元，而且成為空軍目標，錄得1.64億元沽空額，僅次於中移（00941）及中國海外（00688）排在沽空榜第三位。

AIG沽貨機會低

市場怕今個月二十八日，美國國際集團（AIG）手上39.6億股有一半禁售期屆滿，擔心會趁機來個「班水回朝」，芬佬掟定貨先，準備等批股平啲買番。老實講，AIG旗下值錢兼且仲有景的資產唔多，是否會殺雞取卵？筆者相信機會係低於一半，但喺AIG澄清之前，友邦股價的反彈力度可能會弱過其他同業，如果想博保險股反彈，相信估值較低的平保（02318），短期較有條件跑贏友邦。