新地高層落區巡工商樓

一向以心建家嘅新地（00016），其集團高層好多時都會親自去巡視旗下新落成物業，年底將退任集團主席及非執行董事嘅鄺肖卿（郭老太），八十幾歲高齡依然老當益壯，早前再次出動睇樓，今次唔係睇住宅新盤，而係睇近排市況旺過住宅嘅工商樓；聽講郭老太同細仔，集團副主席兼董事總經理郭炳聯（Raymond），同埋其他公司高層去長沙灣巡視集團區內多幢工、商物業。

新地郭氏一眾高層要員對旗下物業關心就係人都知，就連旗下工、商物業都十分有heart，就真係唔係咁多人知。劉Sir收到風，早前郭老太同埋Raymond等一眾公司高層，趁假日人少少，唔使咁逼，一行多人坐住七人車同旅遊巴，浩浩蕩蕩去咗長沙灣參觀旗下多幢新建工、商物業，當然唔少得銷情熾熱嘅環薈中心工廈同卓匯中心寫字樓。聽講佢哋喺每幢大廈大約逗留十幾二十分鐘，聽吓同事講解樓盤最新銷情，同埋買家嘅意見。

環薈中心升值逾半

而Raymond對環薈中心好滿意，話「依家工業樓起到咁靚」，相信呢句話畀唔少買咗該廈嘅買家知道，一定甜在心頭，無買錯貨，聽講依家幢樓二手平均呎價差唔多五千蚊，比起兩年前一手開價升咗超過一半。

至於另一幢集團新建嘅商廈卓匯中心，依家只係剩番幾層高層樓面未賣，二手業主亦乘勢放盤，叫價每方呎約六千元。

主動聽取租戶意見

事實上，Raymond亦素來好主動巡視集團旗下嘅物業，聽吓租戶同埋市民嘅意見，好似全球熱賣嘅手機商日前喺中環國際金融中心商場搞開幕，身為該商場大業主嘅新地，Raymond亦親身出席，聽講佢入場後，成日擔天望地，欣賞室內設計，有時仲笑咪咪，相信佢對該商戶嘅裝修及布置都好滿意。