Fundman睇市：中國海外強者愈強

港股連升六日，連埋昨日的428點，恒指由低位已累積逾2,500點升幅。以為連日大挾空倉，已把淡友趕盡殺絕，殊不知尋日全日沽空金額仲有92.7億，相當於總成交885.3億元的10.47%，由過去四日的單位數重回到一成樓上，反映淡友除實力非凡外，仲相當硬頸。

睇番唔少空軍愛股，尋日都挾得幾誇張，尋日先介紹嘅恒大（03333），比史提芬估計更勁，即市最高見過3.55元，收報3.39元，升16.5%；思捷（00330）升15.7%；中國海外（00688）升7.7% ，呢批藍籌及中型股都炒到好似二三線一樣，照咁睇，更加強筆者對補空倉潮未玩完的睇法。

航運股值得留意

大家會問，到底有咩股票仲可以博反彈？反映乾散貨運費嘅波羅的海乾散貨指數（BDI），唔經唔覺，執筆時再升1%，去到2,127點創今年新高。歐美經濟出事，唔少人擔心航運業會出現嚴重衰退，航運股是相當被「睇死」的板塊，假如市場齊齊醒覺，相信航運股有機會來個像樣的反彈。尋日中國遠洋（01919）報復式抽升17.6%，純粹心水推介，史提芬認為貨櫃生產商勝獅（00716）及內地大型造船民企熔盛（01101），以股論股平到震，下一浪輪到佢哋都唔定。

瑞銀建議留意鋼鐵股，鞍鋼（00347）折舊準則變動後，業績會由見紅的第三季中改善，未來單位生產成本降低，有利業績復甦。另外，昨日勁升的馬鋼（00323）也在瑞銀推薦之列，原因係純粹夠平，市帳率得0.4倍（經過尋日急升25%後升至0.5倍左右），該行定0.7倍市帳率為目標價，分別睇6.4元及3.29元。

航運同鋼鐵股，喺筆者心目中純粹係博反彈之選，如果真係想趁機買股票揸較長時間，內房股依然是重點推介。雖然佛山私自放寬限購令「半日」，最後以暫緩執行而非擱置措施作結，但相信在壓抑房價措施收到成效之後，中央遲早都要放寬部分限制，唔會畀地方政府出現財政問題，以及內房股因為資不抵債而執笠告終。

在行業整固中，每每是強者愈強，舉個例，目前小型內房企業融資困難，中小內房股融資成本都介乎15至20厘，即使有機會低價吸納土儲，亦未必輕易成事，而大型內房股中，龍頭中國海外定必是當中首選。

中海周初公布銷售數據，九月實現房地產銷售額66億元及銷售面積49.2萬平方米，同比雖跌18%和13.2%，環比卻有48.4%和48.3%升幅。累積首九個月計，實現房地產銷售713.4億元，升54.7%，已達到全年銷售目標800億元的89%，今年業績失預算的可能性微乎其微。母公司上月曾兩度增持股權，今日看來，入市時機的確一絕。

股價由低位反彈四成，一一年市帳率1.79倍，只係同○八年金融海嘯時低位看齊，比歷史中位2.96倍低一截。另一點值得注意，自七月開始一直成為空軍目標，沽空佔成交比例持續在10至61%高水平徘徊，一旦基金開始冚倉，相信威力會是相當驚人。