股海實戰：聯想繼續逢低收集

港股繼續挾倉，聽聞一批喺九月中下旬至跟風入場沽空嘅空軍，呢兩日補倉補到氣咳，皆因眼見歐債危機暫時喘穩，加上中央開始出手，協助中小企度年關，唔排除內地九月CPI增幅持續回落的話，人行會調低RRR，故惟有硬着頭皮入場掃貨平倉，典型例子係早前沽空量甚大嘅恒大（03333），全日高位掃到上3.55元，收報3.39元，升16.5%，成交高達9.6億元。

正正由於目前嘅升市係由空倉回補主導，好難評估何處是頂。睇目前嘅形勢，只要外圍冇咩特別利淡消息出現，恒指確有望上叩萬九點關。若然想分享呢次補倉潮所引發嘅升浪，早前沽空甚大嘅國美（00493）、農行（01288）、比亞迪（01211）、龍工（03339）、平保（02318）同中聯重科（01157）都可作考慮。但睇見尋日大市沽空比率又回升至10.4%，自問睇唔通後市，手上又冇咩貨，能忍則忍，畢竟除非內地宏調政策大轉向，否則股市與經濟表現背道而馳嘅可能性唔大。

季度市佔率創新高

個股消息方面，聯想（00992）繼截至六月底止季度超越宏基，穩坐全球PC（個人電腦）製造商老三之位後，據IDC初步統計數字顯示，截至九月底止季度，聯想再進一步，超越戴爾，比市場預期早了一季登上全球老二寶座，季內市佔率及付運量同創新高，市佔率達13.7%（前季為12.2%），付運量達到1,260萬部。

好明顯，聯想已拉近與老大哥惠普嘅距離。早前惠普高層表示，將調整PC部門嘅策略，包括考慮分拆或出售該部門，市場一度盛傳聯想可能係潛在買家，但後來惠普又否定出售，至於是否分拆，本月底可能有最終定案。

顯然，聯想與惠普已展開埋身肉搏戰，惠普亦避無可避，一係就咬緊牙關打一仗，一係就坐定定傾合作。無論結果係強強聯合，抑或有購併活動，都勢必開創新局面。

整體而言，目前PC市場嘅競爭形勢對聯想甚為有利，管理層亦不諱言，購併已成為公司增長策略中一項非常有價值嘅工具，並表明會等喺內地成功搞好智能手機和平板電腦業務後，先至會拓展海外市場，即係話將主力做好喺自己熟悉嘅市場，策略可取。尋日聯想高位做5.4元，收報5.39元，升2.2%，成交2.79億元。維持逢低收集策略，主要阻力喺5.7至5.8元。