樓市出更：豪宅冷鋒慘過海嘯

樓市經過近幾個月調整之後，仍未能擺脫劣勢，連一向唔憂賣嘅豪宅亦受影響，劉Sir睇到代理行嘅數據，上個月35個主要豪宅加埋只得65宗買賣成交，比○八年金融海嘯低潮嘅88宗仲要差，原本一直升緊嘅樓價，喺上個月倒跌1.3%。

受歐債危機擴大、美國經濟衰退、銀行調升按息及收緊按揭成數等因素的影響，豪宅二手交投上月開始轉弱。

上月買賣大減三成

代理行嘅數據顯示，上月35個主要豪宅只錄得65宗買賣個案，比八月份嘅94宗銳減31%，各區交投全面告跌，表現最差嘅新界區交投跌近31%，港島區都跌29%，比較好嘅九龍區就跌咗18%。

期內有9個屋苑出現零成交情況，其中港島區就佔多達8個，好似八月份仍然錄得2宗成交嘅大潭陽明山莊同赤柱富豪海灣，上個月都齊齊食蛋，而中半山帝景園同渣甸山嘉雲臺更加連續出現八、九月未聞成交情況。至於九龍站君臨天下及九龍塘畢架山一號交投更急挫88%與75%。

豪宅樓價升勢斷纜

不過，都有淡市奇葩屋苑，西區寶翠園同九龍塘畢架山峰，上個月就分別錄到9宗同7宗成交，比八月份多出1.25倍同2.5倍。

講到樓價，原本連升八個月的勢頭更加喺上個月斷纜，35個指標豪宅九月份加權樓價指數為148.84點，相比八月嘅150.76點下跌1.3%，大坑名門同擎天半島更加慘重，上月平均呎價只得13,184與14,486元，按月急跌8.2及5.6%，明顯跑輸大市。

雖然近期歐債危機有望紓緩，同埋股市近日反彈，但十月份市場有多個一手新盤搶閘，相信豪宅市場仍受影響，預期本月指標豪宅交投仍然會喺100宗以下嘅水平。