短炒倉：統一 續有反彈空間

匯金入市購入四大內銀股的消息，刺激昨日港股反跌為升，另一方面，十．一黃金周期間內需消費市道據聞相當好景，內地食品股紛紛做好，雨潤（01068）升近7%、中糧（00606）升近5%。不過，零食股表現就相對失色，旺旺（00151）同康師傅（00322）只微升，統一（00220）叫做最好，但都只係升得1.6%。

內地通脹長線看跌

筆者上月亦曾寫過康師傅，當時係因為內地通脹有機會見頂回落，有助紓緩成本壓力同提價，而嚟緊嘅禮拜五（十四日），國家統計局又會公布內地九月份CPI，雖然市場預期或會由八月份的6.2%輕微反彈，但普遍認為通脹喺七月份嘅6.5%已經見頂，未來走勢仍然係睇跌，相信一眾副食品股將可受惠。

睇番幾隻股份嘅中期業績，盈利同毛利率都呈倒退，而經過近日的跌市，現時往績市盈率最低嘅統一都仲講緊二十五倍，而旺旺同康師傅更高達三十一倍同三十倍，唔算吸引，不過大概因為股價早因業績因素而下挫，故在過去幾個月的跌市中，幾隻股份嘅跌幅反而唔算好大，以統一為例，年中高位5.6元，近月都只係一直喺4元樓上橫行，配合市場氣氛改善，短線應有進一步博反彈空間，以4元為支持，上望阻力4.6元。

統一（00220）

阻力位：4.6元

支持位：4.0元