Fundman睇市：美聯要作最壞打算

尋日朝早，比利時向國內最大銀行Dexia注入40億歐元，變相將佢國有化，比利時、法國及盧森堡仲會為銀行的資產擔保。法國財長巴洛因事後話，Dexia之後並無其他法國銀行需要政府打救。無論你信不信，反正史提芬就唔信，淨係揸280億歐元希臘債的Dexia，經已要出動三國聯手，作出900億歐元擔保，仲有四隻「歐豬」合共萬六億歐元的半毒豬債，所以Dexia問題解決，只可以算係歐央行在一一年金融戰役中，避開了的第一槍，跟住場仗點打落去，先係關鍵。

港股波動到暈，恒指開高146點，可是好景不常，好快掉頭向下，午後最多跌269點，見17,437點。收市前最後廿多分鐘，內地消息指中央匯金入市增持四大國有銀行，大市因而出現戲劇性挾倉，指數由低位反彈274點，最後倒升4點，收報17,711點。四大行H股收市價計，工行（01398）由低位反彈4.9%、農行（01288）4.3%、中行（03988）3.8%、建行（00939）2.1%，但大市成交604億元，乃過去十三個交易日最低，從歐股昨日開高（歐洲STOXX指數早從九月下旬低位反彈17.5%），美股場外期貨升過百點，大落後的港股，確實有追落後條件，不過尋日咁低成交仲係似空軍補倉，多過大戶肯入市的格局，到底港股今次係堅彈抑或純粹死貓彈，都係睇多兩日穩陣。

創維銷售表現有驚喜

創維數碼（00751）公布，四至九月累計電視銷售按年升20%，至437.1萬台。家電下鄉政策退場，對家電行業的刺激減退下，創維的銷售表現有點叫人眼前一亮。睇番股價，八月初還在5元樓上，現價3.03元，仲跌緊近四成，分析員估全年盈利升23%，賺14.46億，看最近幾個月的銷售達標機會猶在，一二年市盈率5.5倍，嚴重超賣之後，睇怕反彈見3.5至3.8元機會唔細。

睇電視見到曾特首話自己經過七年任期，有四成市民支持已算合格，簡直係「老鼠跌落天平秤」的典範，令筆者想即刻打去廣管局投訴，叫特首唔好教壞細路。至於市場聚點所在嘅房屋政策問題上，七年來死撐樓市供求無問題的煲呔，最終都在任期尾聲認錯，承認政府房屋政策失誤，導致今日樓價高企引發民怨。市場揣測明天施政報告中，將會宣布復建居屋，樓市過去幾星期交投之靜（過去周末指標屋苑得18宗成交），簡直媲美沙士，會唔會再有調控及壓樓價措施？很難講，近年政府出現匪夷所思的決策唔係未試過，六千蚊淪為笑話，最怕政府又來八萬五，搞到樓市及經濟急轉彎。

美聯（01200）股價今年累跌四成六，到上星期先隨大市由低位2.95元反彈，相信部分原因，係捧場客估施政報告後樓市交投會明朗化有關。美聯業績同樓市盛衰一致，好景時，○七及○九年可年賺6億以上，逆境像○八年，倒蝕4,100萬，除非睇樓市睇得極準，否則唔易玩。由於盈利難測，不妨參考○八海嘯，美聯市帳率及市銷率最低見過1倍及0.45倍，目前為1.4倍及0.63倍，儘管筆者認為3.5元樓下好抵，可博反彈，但最壞打算，股價可以再跌28.5%，即係見2.44元。