股海實戰：雨潤轉勢言之尚早

溫總十．一長假期間親赴溫州處理民間借貸事件；長假完結首天，國家隊匯金入場買入四家內銀A股，消息帶動恒指尋日尾市轉跌為升，收報17,711點，升4點，成交604億元，沽空額50億元，沽空比率回落至8.3%。

到底呢次國家隊入市，對A股刺激作用有多大多久，要拭目以待。但阿莊始終覺得，喺外部形勢嚴峻，內部宏調持續嘅大前提之下，今次匯金出手目的在於「維穩」，故別對後市升勢存過高期望。

恒指有望破萬八關

睇番港股，呢啲水平冇貨喺手嘅，會傾向等恒指上番萬八點先動手開淡倉；有貨喺手嘅亦會傾向等萬八點樓上先食胡，故見尋日大部分時間交投淡靜，買賣兩閒。如今考慮到祖國出手，而技術上恒指又成功考驗17,400點水平承接，估計本輪反彈或可衝穿萬八點，以目前恒指熊證街貨重貨區集中喺收回價18,300及18,500點，不排除大鱷先推高恒指屠「熊」，到月尾再發動空軍襲擊。

近日傳來重慶沃爾瑪以普通豬肉冒充不含禁藥嘅綠色豬肉，而被當局查處嘅消息，政府嚴厲執法，對正牌肉商有利。雨潤食品（01068）股價持續反彈，收報10.3元，升6.96%，乃九月二十三日以來首次重上「花蟹價」收市。

六月以來，空軍利用負面消息做空民企，雨潤成受害者，股價由六月高位累跌達74%之巨！上月下旬公司發出通告，指過去數月媒體嘅持續負面報道動搖消費者信心，加上原材料成本大幅上升，致使第三季度營運數字同比下跌，影響更會持續至末季。

冷靜啲諗，雨潤今年上半年賺16億元，即使下半年冇錢賺，現價市盈率亦僅為單位數字，偏偏股價仍未擺脫一浪低於一浪嘅走勢，而九月下旬以來，仍有多家大行減持，似乎已預示末季業績欠佳，故說其股價「雨過天青」，似乎係言之尚早。冇做「清兵」喺低位撈貨，呢啲位一動不如一靜，本周內地通脹數據出爐，可能係今輪反彈浪嘅高潮，屆時宜留意沽空數字，掌握空軍動向，再作部署。