樓市有排驚乍現「撻大訂」

施政報告前夕，樓市繼續「恐慌」，撻訂潮未有減退迹象，北角區更有買家喺今年三月時攞「長成交」期入貨嘅單幢樓單位，出現過咗大訂、簽埋正約仍被撻訂嘅「極罕有」情況，單單係訂金買家要蝕成30萬元，反映到個買家極唔睇好後市；另外，屯門大興花園同天水圍栢慧豪廷，亦有買家撻訂蝕錢離場個案。

北角單幢樓出現市場極罕見嘅「簽正約」後再撻訂個案，劉Sir聽代理老友講，區內單幢樓嘉安苑一個高層單位，面積大約500方呎，喺今年三月嗰陣，已經畀買家以約超過300萬元購入，再攞埋至少半年成交期，其後簽埋「正約」，畀埋樓價一成大訂。

買家冒追差價風險照「撻」

點知市況轉差，新買家喺完成交易前，連一成大訂都唔要，加埋冒住被追差價危險，都要撻訂唔要個單位，連埋佣金至少蝕超過30萬元。事實上，過咗「大訂」都要撻訂嘅個案真係唔多，而個單位盤被撻訂後，原業主已經再嗌高6%再放盤，有實客個價可以再傾。

栢慧客縮沙損手15萬

銀行唔放水，令屯門區用家遭殃，有代理同劉Sir爆料，話有一位自僱人士，上月底佢以大約250萬元買咗個大興花園2期地下連花園單位，單位室內面積約584方呎，加埋個約400幾呎的花園，當時佢係獲銀行初步估足價。

後來銀行未有批出貸款，買家最後只有「撻訂」收場，連埋使費應該唔見成10萬元，個盤依家再放約260萬元。

有代理又話，天水圍栢慧豪廷有個7座中層單位，原本賣咗約350萬元，新買家更畀咗10萬元訂金，但最終仍撻訂唔買。

據估計連埋佣金及其他使費，至少損失15萬元棄購單位。