股海實戰：全面清倉等終極一跌

全球金融市場經已風聲鶴唳，再來個八號颱風納沙搞搞震，九月份期指歷史性地延後一個交易日結算，兼結算日冇得交易，引來唔少投資者批評，真係「多事之秋」﹗

上周五歐、美市場又再被狂質，睇歐債危機只會愈拖愈糟糕，美國國會即將上演嘅鬧劇又勢必牽動投資者神經。上周五美股納指技術走勢進一步轉弱，確認穿2,400點的話，向下要睇兩千點！

港股上周五成交額905億元，沽空比率創下自九九年以來新高，達14%。基金急於應付贖回之下，季結日唔使「Window dressing」，只有繼續「Sell」﹗內房及內銀現小股災，恒大（03333）單日最多跌近兩成，騰訊（00700）沽空額居榜位，達8.8億元，沽空比率達35%，遠較過去五個交易日嘅平均沽空比率19%為高；新加入成「空」軍追擊對象嘅係濠賭股，永利澳門（01128）沽空額達3.43億元，沽空比率37%。

陸資撤退樓股當災

阿莊早已預言，本月內地「錢荒」會惡化，見上周五Shibor隔晚抽高逾百點子。近日聽聞多咗「陸資」南下沽貨套現，難怪同胞們愛炒作嘅內銀、內房及濠賭股沽壓有增無減。依家最擔心嘅係，中央開始徹查流入內地嘅非法資金來源，加上出現內地房企破產消息只係遲早問題，炒家資金鏈斷裂及企業信心危機嘅雙重打擊之下，唔排除「陸資」除咗沽港股外，仲會沽港樓套現，呢班炒家買賣作風狠快，本港當炒豪宅盤樓價潛在跌幅可能有一至兩成。

外圍、祖國因素皆利淡，除非歐債危機有戲劇性變化，又或者內地肯鬆手，否則短期港股難以扭轉單邊跌市，且看今個「股災月」會否突破○八年十月恒指跌四千點嘅紀錄。

阿莊近期聽到唔少投行朋友話，大笨象滙控（00005）嘅ELN接貨價，經已落到去47元，而且交易量唔細，仲未計呢期大戶齋托住隻中移（00941），相信遲早都要輪到中移洗白白。假設大笨象股價要見47元，中移要見63元，經已相等於恒指要再跌一千點，仲未計幾家藍籌內銀同本地地產股嘅潛在跌幅。

股海長「空」萬里！本來阿莊估計呢轉恒指最差要見萬六點，依家諗落可能有啲過分樂觀。睇到心灰意冷，上星期阿莊話擬趁反彈沽出瑞聲科技（02018），上周五遂以平均價17.24元沽出，另以平均價1.178元斬上實城開（00563），短線會睇位沽埋手上嘅煤氣（00003）、電能（00006）及港鐵（00066），清倉等終極一跌嘅來臨。