補價無譜買公屋中招

過去九個月樓價繼續「癲」，就連向以用家主導的公屋市場近日亦頻錄「癲價」成交，售價屢創新高，有代理朋友同劉Sir講，原來每宗公屋高價成交背後，買賣雙方都經常「低估」補地價費用，往往令單「刁」危危乎。

好似之前有個買家，睇準公屋租金回報高，一口氣購入兩個新界西公屋單位，其中一個單位更以自由市場破頂價逾200幾萬元入市，個買家最初打算參考同類單位補地價約120餘萬元，以及綠表原業主要求「實收」價約100餘萬元推算，以高價購入單位實食「無黐牙」。

低估補價焗畀多筆

點知……公屋自由市場轉讓補價水平，亦隨住私人住宅樓價急升而水漲船高，政府提出嘅估價遠高於原先估計，同時買家又誤以為單位折扣率係五折，點知原來係三四折，補地價金額較原先預計高超過三成，逾160萬元，連同原業主要求實收嘅售價，即單位售價已近300萬元。由於根據協議，補地價有機會要由新買家全數支付，新買家遂要求業主向政府提出補地價上訴。

據了解，上訴之後，單位最終估值亦因市況轉差而被調低，但補地價費用仍較預期為高；代理老友同劉Sir講，新買家最終亦購入該單位，未有撻訂。

事實上，每個自由市場公屋買賣放盤，業主多數只係以綠表價放盤，而單位自由市場最終售價是連同雙方估計補地價金額總和而定，如果估少咗，買家隨時要畀多啲。

長安邨盛產公屋王

翻查土地註冊處記錄，多個百萬公屋王都在今年誕生，難怪政府對公屋市值估價亦「癲升」。其中青衣長安邨可謂全港最貴公屋屋邨，至今百萬公屋王最貴頭五位已經佔咗兩個，其中安潤樓高層02室，七月登記售出，成交價達到255萬元。

另外，喺市區深水埗嘅李鄭屋邨亦係公屋王多產地，今年五月期間，屋邨廉潔樓中高層單位亦以約250萬元售出，暫時係第二貴公屋登記。