市場徐想：品創新業務有錢途

金融市場咁多問題底下，依家都要不斷發掘新商機，近日就睇過堆肯做吓改革嘅公司，冀望呢堆股票跑出重圍。

品創控股（08066）主要做智能卡同塑料卡，基地喺北京同深圳，有自己廠房同管理模式。集團市值14億幾，算係創業板入面嘅巨無霸。一一年國家發改委喺「十二五」規劃入面，已講咗要推動「再製造產業化」，呢個行業會受惠國策嘅支持。品創勝在夠創新，玩智能卡同塑料卡之餘，呢幾年成功同聯營公司Hota（USA）Holdings Corp合作，落實咗中國張家港嘅報廢汽車拆解廠房，配合國家對汽車零件再製造行業嘅支持，希望由新業務帶動自己成功突圍。至於咩係汽車零件再製造？熟車嘅朋友就知道，發動機、變壓器、增加傳動軸、機油泵、水泵、助力泵等等東西，依家資源咁緊絀情況底下，點可以唔搵出路？回收行業正正食正呢條水！

睇番數據，集團盈利增長迅速，○六年賺8萬蚊，一○年已有1,300萬左右盈利，規模愈嚟愈大。○五年到現今股價倍進，又有兩間基金公司入股（Golden Dice同Best Heaven），都係睇中佢嘅盈利增長。歐債危機當前，緊抓國策為上，繼續追蹤、出發！