短炒倉：澳博 收入水漲船高

好耐冇試過因打風而要搞到全日休市，仲要撞啱期指結算，還好近日市況已令唔少人離場，不然今日復市勢必更加立立亂。

今日全球經濟面臨衰退危機，但喺「生意淡薄不如賭博」嘅定律下，澳門博彩業反而愈做愈旺，據澳門博彩監察協調局資料，今年首八個月澳門博彩收益累計高達1,731億澳門元，按年增長46.8%，其中八月份更創新高，單月錄得247.69億澳門元，按年升幅達57%。不過幾隻濠賭股近期表現就唔見得特別標青，以龍頭澳博（00880）為例，八月一日股價高見21元，上周五最低報12.56元，足足跌咗四成，周三收報15.44元，仍較高位唔見兩成六。

其實澳博份中期業績相當唔錯，上半年博彩收益375.34億元，增長41.5%，純利增幅更達七成，至26.66億元。雖則話有新賭場開業搶生意，令澳博市佔率由五月時的32.4%降至八月份的27.2%，但由整體博彩收益增長可見，個餅其實係愈來愈大，故即使市佔率下降，亦不代表盈利前景轉差。

隨着步入第四季，「十一」及聖誕新年等旺季陸續來臨，博彩業收入當可進一步強勁增長，澳博自然受惠，現價預測市盈率不到十五倍，屬吸引水平，上望阻力為50日線17.2元，支持位14.8元。

澳博（00880）

阻力位：17.2元

支持位：14.8元