股海實戰：潤地抗逆能力勝一籌

美國聯儲局伯老前晚嘅講話，被解讀為推QE3留下伏線，但歐盟領袖就解決歐債危機上存分歧，再次觸動投資者嘅神經，結果前晚美股反升為跌，高位計道指回落逾三百點。本來外圍低收，港股淡友坐定定等食胡，誰知期指結算日罕有地遇上八號波，港股休市，若尋晚美股回升，淡友真係一場歡喜一場空！

港股期指順延一日喺今天結算，一來會令衍生產品增加時間值損耗，二來亦會打亂咗唔少大戶嘅算盤，相信今日喺期指、基金季結及場外期權結算活動三者同時進行之下，市況會異常波動，看官宜緊握扶手！

尋日日股早段隨外圍走低，但其後倒升收市，台灣及韓國亦高收。反觀內地A股表現失色，似乎「十一」長假前，願意持貨過假期嘅投資者唔多。反而，喺預視市場「錢荒」情況惡化之下，沽貨套現壓力日增。

調控政策留有一手

評級機構標普最近就內房企業進行測試，結果發現，若明年內房銷售跌一成，將有六家內房企業嘅流動性面臨嚴峻挑戰；若明年內房銷售跌三成，則大部分內房企業都難逃流動性風險問題。

老實講，過去五年，內地房價飆升，造就千千萬萬小富翁誕生，並帶動內需巨輪轉動，經濟持續增長。如今，業主們當然唔願意見到樓價大跌，政府就調控樓市制訂政策，亦留有一手，免令樓價大跌引發社會動盪。所以，暫時阿莊唔太擔心明年內地房價會災難式下滑，但明年房價及銷量出現10至15%嘅跌幅，則算係遲來而可接受嘅調整幅度。

喺內房股之中，華潤置地（01109）憑着背靠華潤集團，實力毋庸置疑。由於今年旗下住宅發展項目集中喺下半年交付，故見今年中期業績遜於市場預期。公司雖獲母公司注入資產以示支持，但市場卻唔多領情，認為注資時機欠佳，而大量發股支付收購，亦對每股盈利產生攤薄效應。

正由於潤地計劃集中喺今年九、十月推盤，偏偏遇上內房冷風，全年銷售目標會否有偏差，甚而影響明年初嘅資金回籠進度，存在變數，畢竟其淨負債比率亦不算低（約73%），這解釋了為何八月以來其股價表現跑輸同屬龍頭內房嘅中國海外（00688）。

不過，若然明年內地樓價要跌三成，相信冇邊間內房企業唔頭痕，潤地喺實力母公司支持下，屆時自可透過重組及其他融資方法應對，相對無依無靠嘅民企，抗逆力仍勝一籌，當行業撥開雲霧，亦自必然係最早再起跑嘅一員，只怕係要見呢一日如今尚有一段距離！