財團「拔釘」效率高

近年發展商併樓速度快過市區重建局，其實佢地併樓出價都唔低，近幾個月就有幾宗強拍市區舊樓重建個案，唔使公開強拍都可以統一業權，好似英皇國際（00163）嘅油麻地砵蘭街項目，喺早前成功購入最後1伙統一業權。

近呢兩年土地審裁處每年入稟申請強拍嘅市區私人舊樓項目已經創歷年新高，所有項目加起上嚟，有機會多過市區重建局成立以來發展咗嘅項目總和。

英皇項目合併發展

早排英皇國際（00163）入稟強拍嘅油麻地砵蘭街58及60號項目，亦都响上個月成功「拔釘」，以842萬元購入最後一伙，搞掂晒成個項目統一業權。公司執行董事當奴張（張炳強）講，項目連同隔籬收購嘅54及56號合併重建，計劃下個月向城規會申請將項目由酒店改作商住發展。

另外，由永光地產譚逢敬等牽頭收購的九龍露明道8至10號，今年二月向土審處申請強拍，當時持有業權份數僅83%左右，仲差1個單位就統一業權，劉Sir喺土地註冊處資料睇到，半年後上述單位响八月中以710萬元登記易手，比原業主○七年買入價升值近50%，又一宗自行統一業權嘅例子。

上環區亦係發展商收購舊權嘅區域，鄰近前荷李活道已婚警察宿舍一幢鴨巴甸街舊樓，今年錄到5、6宗成交，涉及約7,000萬元，市場估計有機會係財團收購。