Fundman睇市：六福長線買貨唔使急

期指結算日，礙於歐盟話事人德國，其國會就金融穩定機制（EFSF）進行投票前夕，港股以悶局來消化前日超過700點的反彈，恒指全日在17,850至18,100點之間來回兩趟，最後收報18,011點，跌119點。

前日恒指反彈722點，翻查過去廿年，港股只係試過78次單日出現超過4%升幅，唔少人即時出來話大市見底。筆者當然都希望大市已經見底，否則長此下去，股民輸到怕都無戲唱，不過睇見前日升市，做淡的對沖基金唔單止無投降，仲要更狠的加注，尋日沽空佔成交比例更去到13.02%，是八月以來最高，話個市脫離危險期，打句問句都唔信。

歐豬毒債難化解

近期特色，係來自歐洲的金融消息，即使唔太差都被視作好消息看待，乜乜歐洲銀行行長願意同歐央行坐低傾傾，居然都被看成希臘獲救一樣，但筆者只怕，大家最後只是一廂情願。現時希臘公共債務等於全國GDP嘅1.6倍，即使全民唔使唔食唔用幫國家做奴隸，都有排還，即使要去番《馬城條約》六成上限，都需要長達二十五年時間，幾乎肯定，違約或者有限度違約會喺不久嘅日子內發生，好彩係希臘佔整個歐盟區經濟權重僅2至3%，即使爆也不代表世界末日，只要唔好搞到火燒連環船，拖埋意大利、西班牙、愛爾蘭同葡萄牙失火就得，可是今日金融市場信心脆弱程度，等於要在煙花廠BBQ唔引發大爆炸一樣困難，點樣可以將天文數字的「歐豬」毒債解毒，再以ECB擔保放出街，其難度及複雜程度，根本就係「Mission Impossible」。

民企嚇怕大孖沙，的確有佢道理，尋日國美（00493）宣布，夥拍北京鵬潤及北京國美，成立國美商業地產開發。內地房地產有搖搖欲墜之感，國美最近才因為政府退出家電下鄉計劃被糟質，管理層此時此刻搞地產，那有不被洗完再洗的道理？

雖則合營公司註冊資本2億元人民幣中，國美只出資9,000萬元人民幣，但不務正業的代價，係市值單日蒸發50億港元，尋日股價急跌0.3元，去到2.34元。雖然估值計12.3倍預期市盈率係好抵買，但管理層詳細解釋點解搞地產前，小心仲有得跌。

珠寶股今年係大起大落，內地豪客一擲千金，上半年六福（00590）、周生生（00116）等業績都超額完成。直到近月，基金經理掉轉槍頭，輸錢下焗住掟強勢股，即使近兩個月沽空唔多（可能成交較疏，未有成為空軍針對目標），但六福股價由八月中高位46.15元，到昨日收市價26.25元，個半月跌掉四成三，都相當得人驚。

姑勿論今年黃金周救唔救到珠寶股，最近同業景福（00280）就承認，在租金壓力下，業績難免受影響。有迹象顯示，內地水緊情況影響到內地大款消費，幾個支持股價強勢的有利條件開始褪色。過去五年，六福估值範圍極闊，最高是今年七月的24.4倍，最低是金融海嘯期間的2.2倍，平均是10.6倍，以大行預測一二年賺11.6億元，預期市盈率十二倍，合理但未至於超值，博反彈目標30至34元，但要重注長線投資的話，最好確認下半年業績未受宏觀環境影響才落錘。